راولپنڈی: ڈیرہ اسماعیل خان کے علاقے درابن میں سکیورٹی فورسز اور دہشت گردوں میں جھڑپ کے دوران پاک فوج کا ایک جوان شہید ہوگیا۔
فوج کے شعبہ تعلقات عامہ (آئی ایس پی آر) کے مطابق سکیورٹی فورسز دہشت گردوں کی فائرنگ کا مؤثر انداز میں جواب دیا، فائرنگ کے تبادلے میں لائنس نائیک مجیب الرحمان شہید ہوگئے۔
آئی ایس پی آر کا کہنا ہے کہ علاقے میں ممکنہ دہشت گردوں کی موجودگی کے خلاف آپریشن جاری ہے۔
گزشتہ روز سکیورٹی فورسز نے شمالی وزیرستان میں دو مختلف کارروائیوں میں تین دہشت گردوں کو ہلاک اور تین کو گرفتار کر کے ہتھیار، گولیاں اور آئی ای ڈیز برآمد کرلی تھیں۔
آئی ایس پی آر کے مطابق سکیورٹی فورسز نے شمالی وزیرستان میں خفیہ اطلاعات پر دو آپریشنز کیے، پہلے آپریشن میں اہم کمانڈر سمیت تین دہشت گرد گرفتار کیے گئے جب کہ دوسرے آپریشن میں تین دہشت گرد مارے گئے۔
دونوں آپریشنز کے دوران ہتھیار، گولیاں اور آئی ای ڈیز برآمد ہوئے، تمام دہشت گردوں کا تعلق حافظ گل بہادر گروپ سے ہے، دہشت گرد فورسز پر حملوں، ٹارگٹ کلنگ اور اغوا برائے تاوان میں ملوث ہیں۔
