واشنگٹن : سابق نائب صدر مائیک پنس کے گھرسے بھی ٹرمپ دور کی خفیہ دستاویزات برآمد ہوئی، جس کے بعد ایف بی آئی نے سابق نائب صدر کیخلاف تحقیقات شروع کردیں۔
تفصیلات کے مطابق امریکا میں خفیہ دستاویزات کی برآمدگی کا پنڈورا بکس کھل گیا، سابق نائب صدر مائیک پنس کے گھرسے بھی ٹرمپ دور کی خفیہ دستاویزات برآمد ہوئی ہیں۔
سابق نائب صدر کے گھر سے غیرملکی دورے سے متعلق خفیہ بریفنگ کا ریکارڈ ملا ہے، ایف بی آئی نے خفیہ دستاویزات ملنے پر سابق نائب صدر کیخلاف تحقیقات شروع کردیں۔
یاد رہے صدر بائیڈن اور ٹرمپ کے گھروں سے بھی خفیہ دستاویزات مل چکی ہیں،امریکی محکمہ انصاف کو بائیڈن کے گھر کی تلاشی میں کلاسیفائیڈ دستاویزات ملی ، 6 خفیہ دستاویزات بائیڈن کے بطور سینیٹر اور اوباما دور میں بطور نائب صدر کام کرنے سے متعلق ہیں۔
وکیل نے بتایا تھا کہ محکمہ انصاف نے 12 گھنٹے تک گھر کی تلاشی لی، اور اہل کاروں نے کچھ ایسے نوٹ بھی لیے ہیں جو، بائیڈن نے بطور نائب صدر ذاتی طور پر ہاتھ سے لکھے تھے۔
یاد رہے کہ اس سے قبل خفیہ سرکاری دستاویزات اس ماہ بائیڈن کی ولیمنگٹن رہائش گاہ سے، اور نومبر میں ایک نجی دفتر سے برآمد ہوئی تھیں۔
ایف بی آئی کی جانب سے صدر بائیڈن کے گھر سے اوباما دور کی خفیہ دستاویزات ملنے پر تحقیقات جاری ہیں۔
