کوئٹہ:  بلوچستان سے سینیٹ کی خالی نشست پر بی اے پی کامیاب رہی، وزیر اعلیٰ بلوچستان جام کمال نے کہا ہے کہ بلوچستان حکومت پانچ سال پورے کرے گی.

ان خیالات کا اظہار انھوں نے میڈیا سے گفتگو کرتے ہوئے کیا، ان کا کہنا تھا کہ بلوچستان میں عوامی پارٹی پورے صوبے کی سیاسی جماعت ہے اور دن بدن مضبوط ہورہی ہے.

جام کمال خان نے کہا کہ بلوچستان عوامی پارٹی نے سینیٹ میں توقع سے زیادہ ووٹ لیے، سینیٹ انتخابات میں مقبولیت بی اے پی کی پذیرائی کی عکاس ہے.

وزیراعلیٰ جام کمال کا کہنا تھا کہ حقوق پروگرام بلوچستان سے متعلق ہرممکن اقدام کریں گے، بلوچستان عوامی پارٹی صوبے میں 5 سالہ حکومتی معیاد پوری کرے گی.

یاد رہے کہ آج بلوچستان سے سینیٹ کی خالی نشست پر انتخاب ہوا، جس میں بلوچستان اسمبلی کے 65 میں سے 63 ارکان نے ووٹ کاسٹ کئے.

مزید پڑھیں: وفاقی وزرا کا مسلسل بلوچستان آنا خوش آئند ہے: وزیر اعلیٰ بلوچستان

اس الیکشن میں بی اے پی کے منظور کاکڑ کامیاب ٹھہرے، انھیں 38 جب کہ ان کے مد مقابل بی این پی کے غلام نبی مری کو 23 ووٹ ملے۔

یاد رہے کہ 11 جنوری 2019 کو وزیر اعلیٰ بلوچستان جام کمال خان نے وفاقی وزیر پیٹرولیم غلام سرور نے مشترکہ طور پر میڈیا سے گفتگو کرتے ہوئے کہا تھا کہ کہا کہ تھا کہ وفاقی وزرا کا مسلسل بلوچستان آنا خوش آئند ہے۔