لاہور: پنجاب حکومت نے شفافیت کے لیے ای ٹینڈرنگ نظام متعارف کرانے کا فیصلہ کرلیا ، وزیراعلیٰ پنجاب کا کہنا ہے کہ نظام مرحلہ وار پروگرام کےتحت نافذ کیا جائے گا، تحریک انصاف کی حکومت ہر سطح پر شفافیت لا رہی ہے۔
تفصیلات کے مطابق پنجاب حکومت نے سرکاری ٹھیکوں میں شفافیت کیلئے ‘ای ٹینڈرنگ’ نظام متعارف کرانے کا اعلان کر دیا، وزیراعلیٰ پنجاب عثمان بزدار نے اعلیٰ سطحی اجلاس میں فیصلے کی منظوری دے دی ہے۔
وزیراعلیٰ پنجاب نے کہا سرکاری محکموں میں نظام جلد متعارف کرادیا جائے گا، نظام مرحلہ وار پروگرام کےتحت نافذ کیا جائے گا، نئے مالی سال سے محکمے نئے نظام کے تحت ٹھیکے دینے کے پابند ہوں گے۔
عثمان بزدار کا مزید کہنا تھا تحریک انصاف کی حکومت ہر سطح پر شفافیت لا رہی ہے، ای ٹینڈرنگ سسٹم کے ذریعے سرکاری ٹھیکوں میں شفافیت آئے گی اور بدعنوانی کا خاتمہ ہوگا۔
مزید پڑھیں : قانون کی بالادستی، میرٹ اور شفافیت کا فروغ ہمارا ہدف ہے، عثمان بزدار
یاد رہے وزیراعلیٰ پنجاب عثمان بزدار کا کہنا تھا حکومت نے ذاتی مفادات کی بجائے ملکی مفادات کی سیاست کو اپنایا ہے، قانون کی بالادستی، میرٹ اور شفافیت کا فروغ ہمارا ہدف ہے۔
وزیراعلیٰ پنجاب نے کہا تھا وزیراعظم عمران خان کی قیادت میں پاکستان تبدیل ہورہا ہے، ہماری نیت اور سمت درست ہے، فیصلے سب کی مشاورت سے کیے جارہے ہیں، عوام کے حالات بدلنے کے لیے دن رات محنت کررہے ہیں۔
