لاہور : وزیراعلیٰ پنجاب چوہدری پرویز الٰہی کا کہنا ہے کہ عوام کی فلاح کیلئے کوشاں ہیں ، عمران خان ہمارے لیڈر ہیں، ہم ان کے ساتھ ہیں۔
تفصیلات کے مطابق وزیراعلیٰ پنجاب چوہدری پرویز الٰہی سے رحیم یار خان کے ایم این اے جاوید وڑائچ اور ایم پی اےآصف مجید کی ملاقات ہوئی۔
ملاقات میں سیاسی صورتحال اور رحیم یار خان میں جاری فلاح عامہ کے منصوبوں پر بات چیت کی گئی، اس موقع پر سینئر صوبائی وزیر اسلم اقبال ، پرنسپل سیکرٹری وزیراعلیٰ محمد خان بھٹی بھی موجود تھے۔
چوہدری پرویز الٰہی نے کہا کہ عوام کی فلاح کیلئے کوشاں ہیں،ہمارابنیادی مقصدعوام کی خدمت ہے، پی ڈی ایم کی وفاقی حکومت ہر محاذ پر بری طرح ناکام رہی ہے۔
وزیراعلیٰ پنجاب کا کہنا تھا کہ پی ڈی ایم کی حکومت نے معیشت کا جنازہ نکال دیا ہے، ملک بچانے کا نعرہ لگانے والوں نے پاکستان کو تباہی کے دہانے پر پہنچا دیا۔
انھوں نے مزید کہا کہ جو ملک بچانےنکلےتھے اب ان سےاپنی سیاست بھی نہیں بچ رہی، مخالفین کو ملک کی کوئی پرواہ نہیں، یہ صرف اپنے کیس ختم کرا رہے ہیں۔
چوہدری پرویز الٰہی نے ایک بار پھر کہا کہ عمران خان ہمارے لیڈر ہیں،ہم ان کے ساتھ ہیں۔
