کراچی: وزیراعلیٰ سندھ مراد علی شاہ نے سندھ میں کورونا کے پھیلاؤ کے خدشے کے پیش نظر وزیراعظم سے 2ہفتےکیلئےبین الصوبائی آمدورفت بند کرنے کی درخواست کردی۔
تفصیلات کے مطابق سندھ حکومت کے ترجمان مرتضیٰ وہاب نے سماجی رابطے کی ویب سائٹ ٹوئٹر پر اپنے بیان میں کہا ہے کہ وزیراعلیٰ سندھ مراد علی شاہ نے وزیراعظم عمران خان سے 2 ہفتے کیلئے بین الصوبائی آمدورفت بندکرنےکی درخواست کردی ، بین الصوبائی آمدورفت بند کرنے سے کوروناپھیلاؤ میں کمی آسکتی ہے۔
CM Sindh has requested Prime Minister to close inter provincial movement for 2 weeks so that surge of #COVID19 cases can be curtailed.
— Murtaza Wahab Siddiqui (@murtazawahab1) March 31, 2021
اس سے قبل وزیر تعلیم سندھ نے میڈیا سے گفتگو کرتے ہوئے کہا تھا کہ وفاق چاہتا ہے سندھ میں کورونا نہ بڑھے تو بین الصوبائی رابطے بند کریں، فوری طور پر ہوائی جہاز، ٹرین اور بسوں کی سندھ میں آمد روکی جائے۔
سعید غنی کا کہنا تھا کہ صرف اسکولز بند کرنے سے کورونا وائرس سے نہیں بچا جاسکتا، ہوائی جہاز ، ٹرین اور بسوں کے ذریعے بھی رابطے بند کئے جائیں۔
خیال رہے ملک میں کوروناوائرس کی تیسری لہر کا پھیلاؤ بدستور بڑھ رہا ہے، چوبیس گھنٹے میں خطرناک وائرس نے مزید 78 جانیں لے لیں جبکہ ایک روز میں چارہزارسات سوستاون کیس رپورٹ ہوئے اور مثبت کیسز کی شرح دس اعشاریہ آٹھ فیصد رہی۔
