راولپنڈی: آرمی چیف جنرل عاصم منیر نے دشمن قوتوں اور ان کے سہولتکاروں کے مذموم عزائم ناکام بنانے کے عزم کا اعادہ کیا ہے۔
فوج کے شعبہ تعلقات عامہ (آئی ایس پی آر) کے مطابق آرمی چیف جنرل عاصم منیر نے جنوبی وزیرستان کے ضلع وانا کا دورہ کیا جہاں ان کو سکیورٹی صورتحال، انسداد دہشتگردی کے خلاف جاری آپریشنز اور علاقے میں ترقیاتی اقدامات سے متعلق بریفنگ دی گئی۔
دورے کے دوران آرمی چیف جنرل عاصم منیر نے افسران اور جوانوں سے ملاقات کی اور ان کی آپریشنل تیاریوں اور بلند حوصلے کی تعریف کی۔
افسران و جوانوں سے خطاب کرتے ہوئے سپہ سالار نے کہا کہ پاک فوج دشمنوں کے تمام عزائم ناکام بنا دے گی۔ انہوں نے فورسز اور قانون نافذ کرنے والے اداروں کی قربانیوں کو خراج تحسین پیش کیا اور دشمن قوتوں اور ان کے سہولتکاروں کے مذموم عزائم ناکام بنانے کے عزم کا اعادہ کیا۔
جنرل عاصم منیر کا کہنا تھا کہ خیبر پختونخوا پولیس کی استعداد کار بڑھانے کیلیے تکنیکی مدد فراہم کرتے رہیں گے۔
انہوں نے مختلف ترقیاتی منصوبوں کو آگے بڑھانے میں عوام کے کردار کی تعریف کی اور خیبر پختونخوا کے عوام کی خوشحالی اور ترقی کیلیے تمام وسائل بروئے کار لانے کے عزم کا اعادہ کیا۔
سپہ سالار نے دہشتگردی کے خلاف قبائلی عمائدین کی غیر متزلزل حمایت پر شکریہ ادا کیا، یادگار شہدا پر پھول چڑھائے اور شہدا کو خراج عقیدت پیش کیا۔
آئی ایس پی آر کے مطابق آرمی چیف کے وانا پہنچنے پر کور کمانڈر پشاور نے ان کا استقبال کیا۔
