راولپنڈی: آرمی چیف جنرل قمر جاوید باجوہ نے عید اور محرم کے دوران ہر ممکن احتیاطی تدابیر اختیارکر نے پر زور دیا ہے۔
تفصیلات کے مطابق آرمی چیف جنرل قمر جاوید باجوہ کی زیرصدارت 233 ویں کورکمانڈرز کانفرنس میں پاک فوج کی تیاریوں اور علاقائی سیکیورٹی صورتحال پر تبادلہ خیال کیا گیا۔
ڈی جی آئی ایس پی آر کے مطابق اجلاس میں داخلی اور بیرونی سیکیورٹی خدشات پر بات چیت کی گئی۔ آرمی چیف کو کرونا وبا کی روک تھام اور ٹڈی دل پر قابو پانے کے امور پر بریفنگ دی گئی۔
آرمی چیف نے کرونا اور ٹڈی دل پر قابو پانے کی کوششوں کی تعریف کرتے ہوئے عید اور محرم الحرام کے دوران ہر ممکن احتیاطی تدابیر اختیار کرنے پر زور دیا۔
کور کمانڈرز کانفرنس میں 5اگست کے بعد مقبوضہ کشمیر کی صورتحال اور بھارتی ظلم پر بھی گفتگو کی گئی۔کانفرنس کے شرکا نے کشمیریوں کے حق خودارادیت کی جدوجہد کو خراج تحسین پیش کیا۔
ڈی جی آئی ایس پی آر کے مطابق آرمی چیف نے پاک فوج کی پیشہ ورانہ تیاریوں پر اطمینان کا اظہار کرتے ہوئے ملکی سیکیورٹی کے لیے خطرہ بننے والی ہر کوشش کو ناکام بنانے کے عزم کا اعادہ کیا۔
