کراچی : کمشنر سلیم راجپوت نے کہا کہ 31 اکتوبر کے بعد غیرقانونی مقیم غیرملکیوں کو قانونی طور پر بھیجیں گے، انھییں ہولڈنگ پوائنٹ پرجمع کریں گے ، جس کے بعد جیکب آباد،چمن بارڈر پرسیکیورٹی حکام کے حوالے کیا جائے گا۔
تفصیلات کے مطابق غیرقانونی طورپرمقیم غیرملکیوں کے کراچی سے انخلا کے معاملے پر کمشنر سلیم راجپوت کی ہدایت پر افغان بستیوں اور متعلقہ علاقوں کی مساجد سے واپسی کے اعلانات کئے جارہے ہیں۔
کمشنرکراچی سلیم راجپوت نے کہا ہے کہ 31 اکتوبر تک جونہیں جائے گا اُسےقانونی طورپربھیجیں گے، غیر قانونی تارکین وطن میں شامل سوا لاکھ افراد کو رکھنے کا انتظام بھی کرلیا گیا ہے۔
سلیم راجپوت نے بتایا کہ کراچی میں کسی ایک مقام کو ہولڈنگ پوائنٹ کا درجہ دیا جائے گا، ڈپٹی کمشنرز اور سیکیورٹی ادارے افغان باشندوں کو ہولڈنگ پوائنٹ پر جمع کریں گے ، جس کے بعد غیرملکیوں کو جیکب آباد اور چمن بارڈر پرسیکیورٹی حکام کے حوالے کیا جائے گا۔
ان کا کہنا تھا کہ کراچی سے 5،5بسوں پر مشتمل قافلے کو سیکیورٹی میں روانہ کیا جائے گا، یکم نومبر کے بعد غیر قانونی طور پر مقیم افراد کو نہیں رہنے دیں گے، اب تک کراچی سے 18 ہزار افراد کو بھیجاجاچکا ہے۔
