ممبئی: بھارت کی جانب سے چاند پر بھیجے گئے چندریان 3 مشن کا مذاق اُڑانے پر مشہور اداکار پرکاش راج کے خلاف مقدمہ درج کر لیا گیا۔
میڈیا کی رپورٹس کے مطابق ہندو انتہا پسند تنظیم کے ایک رہنما کی جانب سے ریاست کرناٹک کے ضلع باگلکوٹ میں اداکار کے خلاف اندراج مقدمے کیلیے درخواست دی گئی۔
ایف آئی آر کے مطابق پرکاش راج نے 20 اگست کو سماجی رابطے کی ویب سائٹ ایکس پر مشن چندریان 3 کا مذاق اُڑایا، انہوں نے اس متعلق ایک کارٹون بھی پوسٹ کیا جو خلا میں ایک کپ سے دوسرے کپ میں چائے بھر رہا ہے۔
BREAKING NEWS:-
First picture coming from the Moon by #VikramLander Wowww #justasking pic.twitter.com/RNy7zmSp3G— Prakash Raj (@prakashraaj) August 20, 2023
مقدمے میں مزید کہا گیا کہ اداکار نے اپنی ٹوئٹ میں لکھا کہ یہ وکرم لینڈر کی چاند سے آنے والی پہلی تصویر ہے۔
چندریان 3 کا مذاق اُڑانے پر سوشل میڈیا صارفین نے ان پر کڑی تنقید کی۔ زیادہ تر نے یہی کہا کہ اداکار کی ٹوئٹ سے ظاہر ہوتا ہے کہ وہ بھارتی وزیر اعظم نریندر مودی اور ان کی جماعت بھارتیہ جنتا پارٹی (بی جے پی) سے کس قدر نفرت کرتے ہیں۔
یاد رہے کہ پرکاش راج ماضی میں نریندر مودی کو ’چائے والا‘ کہہ کر مخاطب کر چکے ہیں۔
مذکورہ ٹوئٹ پر بہت زیادہ تنقید کے بعد اداکار نے ایک اور ٹوئٹ کرتے ہوئے لکھا کہ ’نفرت کو صرف نفرت دکھائی دیتی ہے۔ میں آرم اسٹرانگ کے زمانے کے ایک لطیفے کا ذکر کر رہا تھا اور کیرالہ چائے والے کا جشن منا رہا تھا۔‘
انہوں نے مزید لکھا کہ اگر آپ کو مذاق سمجھ نہیں آتا تو آپ خود ایک مذاق ہیں۔
