دفتر میں یا کوئی اور کام کرتے ہوئے اکثر ہمیں بے توجہی کی شکایت رہتی ہے اور ہم اپنی توجہ مرکوز نہیں کر پاتے، تاہم توجہ مرکوز کرنے کے لیے ایک آسان طریقہ اپنایا جاسکتا ہے۔
ہمارا تعلق کسی بھی شعبے سے ہو ایک وقت آتا ہے کہ ذہن تھکن کی وجہ سے کسی بھی کام پر توجہ نہیں دے پاتا، جب ذہن مستقل کام کی صورت میں تھک جاتا ہے تو مزید توجہ سے کام کرنا مشکل ہوجاتا ہے اور اگرکام کر بھی لیا جائے تو غلطی کا امکان بڑھ جاتا ہے۔
تاہم کچھ تدابیر اختیار کر کے آپ کام کے دوران اپنے ارتکاز اور توجہ کو بڑھا سکتے ہیں، اس کے لیے جو طریقہ اختیار کیا جاتا ہے اسے پومو دورو کہتے ہیں، پومو دورو اطالوی زبان میں ٹماٹر کو کہتے ہیں۔
یہ ایک ایسا طریقہ کار ہے جس میں آپ کام کو وقت کے حساب سے ترتیب دیتے ہیں اور مقررہ وقت پر تمام کام کو چھوڑ کر کچھ وقت کے لیے وقفہ لیتے ہیں، اس طرح ذہن سکون کی حالت میں کچھ لمحے گزار کر دوبارہ بھرپور توجہ سے کام کے لیے تیار ہوجاتا ہے۔
اس کے لیے دن کے آغاز پر ایک فہرست بنائیں اور ان تمام کاموں کو تحریر کریں جو دن بھر میں انجام دینے ہیں۔
سب سے پہلا جو کام انجام دینا ہے اس کے لیے 25 منٹ کے لیے ٹائمر سیٹ کریں، اور کام پر لگ جائیں۔ وقت ختم ہونے پر، 5 منٹ کا وقفہ لیں۔
اس طرح کے چار سیشنز کے بعد ایک طویل وقفہ لیں، جو عام طور پر آدھے گھنٹے یا اس سے زیادہ کا ہو، اس وقفے میں چہل قدمی کریں یا پھر چائے یا کافی کا ایک کپ لیں۔
اس عمل کو پھر دوبارہ شروع کریں، اس طریقہ کار پر عمل کرنے والوں کا کہنا ہے کہ ان کے کام نہ صرف وقت پر مکمل ہوگئے بلکہ ان کے توجہ دینے کی استعداد بھی برقرار رہی۔
