امریکی ریاست فلوریڈا کے ہوائی اڈے کے قریب زیر تعلیم کالج کیمپس سے جنگ عظیم دوم کا بم برآمد ہوا ہے۔
غیرملکی خبررساں ادارے کی رپورٹ کے مطابق فلوریڈا کے ہوائی اڈے کے قریب زیر تعلیم کالج کیمپس میں کام کرنے والے مزدوروں کو جنگ عظیم دوم کا بم ملا۔
ہرنینڈو کاؤنٹی شیرف آفس کے مطابق عملہ اس جگہ کام کررہا تھا جو مستقبل بروکس ول میں ولٹن سمپسن ٹیکنیکل کالج ہوگا، وہاں سے مزدوروں کو زمین میں دفن بم ملا ہے۔
شیرف آفس کے مطابق بم برآمد ہونے کے بعد تقریباً ڈیڑھ میل کا علاقہ خالی کروادیا گیا اور بم ڈسپوزل اسکواڈ کی آمد تک قریبی سڑکیں بند کردی گئیں۔
ماہرینِ دھماکا خیز مواد کے مطابق 453 کلو گرام وزنی جنگِ عظیم دوم کا یہ خستہ حال مارک 65 بم غیر فعال تھا۔
شیرف آفس کے مطابق ٹمپا میں میں میک ڈیل ایئرفورس بیس کے عملے کے ذریعے بم کو ناکارہ بنایا جائے گا۔
خیال کیا جارہا ہے کہ بم دوسری جنگ عظیم کے دور کے فوجی ہوائی اڈے سے منسلک ہے۔
