اسلام آباد : بلوچستان سے متعلق عالمی پراپیگنڈے کیلئے بھارتی صحافی منیش رائے کے بلوچ دہشت گردوں سے بذریعہ سہولت کاری رابطوں کا انکشاف ہوا۔
تفصیلات کے مطابق کمانڈر کلبھوشن کی بلوچستان سے گرفتاری اور بھارتی سازشوں کا منہ بولتا ثبوت پہلے ہی موجود ہیں، اب بھارتی خفیہ ایجنسی را، بھارتی میڈیا اور بلوچ دہشت گردوں کا گٹھ جوڑ بے نقاب ہوگیا۔
مودی سرکار کی جانب سے بلوچستان سے متعلق عالمی پراپیگنڈے کیلئے بھارتی صحافیوں کا استعمال کیا جارہا ہے، بھارتی صحافی کے بلوچ دہشت گردوں سے ہمسایہ ملک میں بذریعہ سہولت کاری رابطوں کا انکشاف ہوا۔
بھارتی صحافی منیش رائے را کے کرنل اشوک سے براہ راست رابطے میں ہے، جو بلوچستان ڈیسک کا انچارج ہے، بھارتی صحافی منیش رائے بلوچستان کے پرامن نوجوانوں کو بہکانے کی کوششیں کرتا ہے۔
بلوچستان میں پمفلٹس اور تربیتی دستاویز کو پروپیگنڈا مواد کے طور پر استعمال کیا جارہا ہے ، منیش رائے نے متعدد بلوچ دہشتگردوں سمیت اعلیٰ قیادت کے انٹرویوز بھی کئے۔
بلوچ لبریشن فرنٹ کے گوہرام بلوچ، بلوچ نیشنل آرمی کے گلزار شمبے اور بلوچ لبریشن آرمی کے حربیار مری شامل ہیں۔
بھارتی صحافی منیش رائے پاکستان، بھارت ،اسرائیل کے خبر رساں اداروں میں دہشت گرد گروپوں پر کالم بھی لکھ چکا ہے جبکہ بلوچ دہشت گرد سہولت کار عبدالجبار کریم زئی عرف راج دفتر کے ذریعے انٹرویو حاصل کرتا ہے۔
عبدالجبار کریم زئی کا بھارتی خفیہ ایجنسی را سے رابطو ں کے لئے خفیہ نام ’’راج دفتر‘‘ ہے، عبدالجبار کریم زئی عرف راج دفتر بھارت اور بلوچ دہشت گردوں سےمستقل رابطے میں ہے۔
سہولت کاری کے عوض ہمسایہ ملک کے راج دفتر میں علاج کیلئے مالی معاونت حاصل کرتا ہے جبکہ منیش رائے بلوچ دہشت گرد گروپوں کی جانب سے پروپیگنڈا رپورٹس مرتب کرنے کا بھی ذمہ دار ہے۔
منیش رائے نے حال ہی میں بلوچ لبریشن آرمی کی سالانہ کارکردگی رپورٹ شیئر کی ، مودی سرکار کے دہشتگردانہ اقدامات کے باعث پورے خطے کا امن داؤ پر لگ چکا ہے۔
