لاہور : عدلیہ مخالف بیانات پر سابق وزیراعظم میاں نواز شریف کے خلاف توہین عدالت کی درخواست پر سماعت غیر معینہ مدت تک ملتوی کر دی گئی۔
تفصیلات کے مطابق لاہور ہائیکورٹ کے جسٹس مامون رشید نے نواز شریف کے خلاف توہین عدالت کیس کی سماعت کی، عدالتی سماعت کے موقع پر درخواست گزار عدالت پیش نہ ہوئے جس پر کاروائی بغیر سماعت کے غیر معینہ مدت تک ملتوی کر دی گئی۔
یہ درخواست خدائی خدمت گار تحریک کے سربراہ محمود اختر نقوی کی جانب سے دائر کی گئی، درخواست میں کہا گیا تھا کہ سپریم کورٹ پانامہ کیس کے فیصلے کے بعد نوازشریف عدلیہ مخالف بیان بازی کے ذریعے عوام کو اکسانےکی کوشش کر رہے ہیں، عدلیہ مخالف بیان بازی واضح طور پر توہین عدالت ہے۔
درخواست میں کہا گیا ہے کہ آئین کے تحت عدلیہ کو سکینڈلائز نہیں کیا جا سکتا، ملکی آئین کے تحت عدالتی فیصلوں کے خلاف بیان بازی کی بجائے اپیل اور نظر ثانی کی جا سکتی ہے۔
درخواست میں استدعا کی گئی ہے کہ توہین عدالت کرنے پر میاں نوازشریف کے خلاف آئین کے آرٹیکل دو سو چار کے تحت توہین عدالت کی کاروائی کی جائے۔
