اسلام آباد: شمالی وزیرستان میں کاپر مائننگ منصوبہ مکمل طور پر فعال ہو گیا ہے۔
تفصیلات کے مطابق ماضی میں جنگ و جدل کا میدان رہنے اور ترقی سے نابلد شمالی وزیرستان پاک فوج کی کاوشوں سے ملکی معیشت کی بحالی میں پیش پیش رہنے لگا ہے، کچھ عرصہ قبل شمالی وزیرستان میں کاپر مائننگ منصوبے کا سنگ بنیاد رکھا گیا تھا جو اب مکمل طور پر فعال ہو چکا ہے۔
ماہرین کا کہنا ہے کہ ایس آئی ایف سی (اسپیشل انویسٹمنٹ فیسلیٹیشن کونسل) کا اہم جز مائن اینڈ منرل ملکی معیشت میں معجزاتی ترقی کا سبب بنیں گے، ایس آئی ایف سی کے زیر اثر اہم شعبوں میں مائن اینڈ منرل خصوصی اہمیت رکھتا ہے، پاکستان بھر میں بھرپور معدنی ذخائر موجود ہیں جن میں سے ایک شمالی وزیرستان بھی ہے جہاں کاپر مائننگ پراجیکٹ کا وسیع پیمانے پر کام جاری ہے۔
کاپر مائننگ کے شعبے سے منسلک مختلف افراد نے شمالی وزیرستان میں کاپر مائننگ سے متعلق اظہار خیال کیا، مائننگ منیجر نے کہا ہم نے ملک بھر سے لوگوں خصوصاً قبائلیوں کو بھی اس پراجیکٹ میں شامل کیا ہے، ماضی میں شمالی وزیرستان پسماندہ تھا لیکن اب ترقی کی راہ پر گامزن نظر آتا ہے۔ انھوں نے کہا پاکستان کی معاشی ترقی میں ایف ڈبلیو او اہم کردار ادا کرتا ہے، یہ پراجیکٹ پاکستان کی جی ڈی پی بڑھانے میں مثبت کردار ادا کرے گا۔
مائننگ جیالوجسٹ کا کہنا تھا کہ ہمارے ملک میں کاپر کی اہمیت کا ادراک ہونا دراصل پاکستانی معیشت میں بہتری لانے کے مترادف ہے، منیجر ایڈمنسڑیشن نے کہا کہ شمالی وزیرستان امن و امان کا گہوارہ بن چکا ہے، پاکستانی عوام، بین الاقوامی کمیونٹی کو پیغام دینا چاہتا ہوں کہ یہاں آئیں اور سرمایہ کاری کریں، یہاں روزگار کے بے شمار مواقع ہیں۔
جونیئر منیجر نے کہا کہ اس پراجیکٹ کے شروع ہونے سے علاقے میں معاشی لحاظ سے ترقی دیکھنے میں آئی ہے، اس پراجیکٹ میں 80 فی صد کام کرنے والے ملکی جب کہ 20 فی صد غیر ملکی ہیں، کرشنگ انچارج نے کہا کاپر مائننگ پر اجیکٹ ملکی معیشت میں اہم کردارادا کر رہا ہے، ایچ ایس ای ٹرینی نے کہا انشاللہ ہم اس پراجیکٹ میں مزید ترقی کریں گے، ایک کان کن نے کہا کہ کاپر پراجیکٹ مضبوط معیشت اور عوامی فلاح کا ضامن ہوگا، اس پراجیکٹ سے روزگار کے مواقع اور ملک کی خوش حالی کا نیا دور کھلے گا۔
