مانچسٹر : کرونا وائرس کا پھیلاؤ روکنے کے لیے برطانوی پولیس نے شاہراؤں پر باقاعدہ چیک پوائنٹس قائم کرنے کا فیصلہ کرلیا۔
اے آر وائی نیوز کی رپورٹ کے مطابق برطانیہ ان ممالک میں سے ہے جو کرونا وائرس سے متاثر ہیں، برطانوی پولیس نے جان لیوا مرض کی روک تھام کےلیے شاہراؤں پر نچیک پوائنٹس بنانے کا فیصلہ کیا ہے۔
پولیس ڈرائیورز کو روک کر ان سے باہر آنے کی وجہ دریافت کرے گی اور بغیر وجہ باہر آنے والے ڈرائیورز کو جرمانے کیے جائیں گے۔
خیال رہے کہ برطانیہ میں اس سے قبل چیک پوائنٹس قائم نہیں کیے گئے، پولیس کی جانب سے یہ فیصلہ لوگوں کے بغیر وجہ باہر آنے کی وجہ سے کیا گیا کیونکہ قومی ایمرجنسی کے اعلان کے بعد لوگوں کی بڑی تعداد بار بی کیو پارٹیاں کرتے پکڑی گئی۔
نمائندہ اے آر وائی کے مطابق منچلے سڑکوں پر بلاوجہ موٹر سائیکلوں اور کاروں میں گھومتے نظر آرہے ہیں، پولیس کا کہنا ہے کہ چیک پوائنٹس کا مقصد حکومتی احکامات پر سختی سے عمل درآمد کو یقینی بنانا ہے۔
نمائندہ اے آر وائی کا کہنا ہے کہ حکومت کی جانب سے پولیس کو دو سال کے لیے خصوصی اختیارات دیئے گئے ہیں، پولیس کسی بھی شخص کو روک سکتی ہے اور جرمانہ بھی کر سکتی ہے جبکہ وائرس میں مبتلاء ہونے کی صورت میں زبردستی قرنطینہ میں بھی کر سکتی ہے۔
برطانوی وزیراعظم بورس جانسن بھی کورونا وائرس کا شکار
خیال رہے کہ کرونا وائرس کی موذی وبا میں برطانوی وزیر اعظم بورس جانسن بھی مبتلا ہوگئے ہیں، جس کے بعد وہ قرنطینہ میں چلے گئے ہیں، بورس جانسن کا کہنا ہے کہ ویڈیو کانفرنس کےذریعے اپنی حکومتی ذمہ داری نبھاتا رہوں گا۔
