قطر : وزیر صحت شیخ ڈاکٹر محمد بن حماد الثانی نے کہا ہے کہ کورونا وائرس کے حوالے سے ہر شہری کا خیال رکھا جارہا ہے چاہے وہ ملکی ہوں یا غیرملکی، گھبرانے کی ضرورت نہیں، سب کا خیال رکھیں گے۔
یہ بات انہوں نے میڈیا سے گفتگو میں کہی۔ ڈاکٹر محمد بن حماد الثانی کا کہنا تھا کہ صحت کے حوالے سے ملک ان حالات کے لئے ہر طرح سے تیار ہے اور عوام کو کسی خوف و ہراس میں مبتلا ہونے کی ضرورت نہیں، میں آپ کو یقین دلانا چاہتا ہوں کہ کسی بھی حوالے سے گھبرانے کی ضرورت نہیں اور ہر چیز ترتیب میں ہے، یہ ملک آپ میں سے ہر ایک کے لئے ہے۔
قطری ذرائع ابلاغ کئے مطابق ان کا مزید کہنا تھا کہ ہم ملک کے تمام لوگوں کا خیال کرتے ہیں چاہے وہ قطری ہوں یا غیر ملکی ہر شخص کو صحت کی نگہداشت کی خدمات یکساں طور پر مہیا کی جاتی ہیں۔
انہوں نے بتایا کہ کورونا سے متاثرہ پہلے جن چار مریضوں کا علاج کیا گیا ان کا تعلق اردن ، فلپائن ، سوڈان اور ایران سے تھا جس سے صاف طاہر ہے کہ ہم تمام لوگوں کی دیکھ بھال کرتے ہیں۔ کورونا وائرس کے سلسلے میں حکومت نے بڑے پیمانے پر اہم اقدامات کیے ہیں۔
