تم تکلف کو بھی اخلاص سمجھتے ہو فرازؔ
دوست ہوتا نہیں ہر ہاتھ ملانے والا
احمد فراز کی غزل کا یہ شعر سماج میں مادّہ پرستی، مفاد سے جڑے تعلقات، کاغذی رشتوں، بناوٹی قربت اور تصنع سے بھرپور میل جول کی لفظی عکاسی کرتا ہے، اور بتاتا ہے کہ گرم جوشی سے مصافحہ کرنے والے سبھی لوگ ہم سے مخلص اور دوست نہیں ہوتے بلکہ ہماری طرف بڑھا ہوا اُن کا ہاتھ، پُرتپاک انداز اکثر ایک رسم کی تکمیل اور سماجی تعلق نبھانے کی کوشش سے زیادہ نہیں ہوتا۔
یہ تو ایک عام حقیقت ہے، لیکن اس وقت دنیا کورونا وائرس کی شکل میں ایک خوف ناک حقیقت کا سامنا کر رہی ہے جس میں مصافحہ کی رائج اور معروف شکل سے گریز اور میل جول سے بچنے میں ہی عافیت ہے۔
طبی ماہرین کی ہدایات پر دنیا بھر میں لوگ مصافحہ کرنے یا ہاتھ ملانے سے اجتناب برت رہے ہیں، لیکن ملاقات کے وقت گرم جوشی اور اپنائیت کا اظہار کرنا بھی ضروری سمجھا جاتا ہے، اور دنیا نے اس کا حل نکال لیا ہے۔
ان تصاویر میں آپ "ہینڈ شیک” کے مختلف مگر نئے انداز دیکھ سکتے ہیں۔
