تہران : ایران نے کرونا وائرس کو پھیلنے سے روکنے کے لیے اپنی جیلوں سے 54 ہزار سے زائد قیدیوں کو رہا کر دیا ہے ، ایران میں اب تک 99 افراد کرونا وائرس سے ہلاک ہو چکے ہیں ۔
تفصیلات کے مطابق چین کےبعد ایران میں کرونا وائرس نے زور پکڑلیا، جہاں اب تک 99 افراد جان سے گئے اور ڈھائی ہزار سے زائد متاثرہیں، ایران نے کرونا وائرس پھیلنے سے روکنے کیلئے چون ہزار صحت مند قیدیوں کو عبوری ضمانت پر رہا کر دیا۔
ایرانی حکام کے مطابق قیدیوں کی رہائی عارضی ہے، رہائی سے قبل قیدیوں کے ٹیسٹ کیےگئے اور جن کے ٹیسٹ منفی تھے انہیں ضمانت پر رہا کیاگیا جبکہ پانچ سال سے زائد سزا پانے والے قیدیوں کو رہا نہیں کیا گیا ۔
ایرانی حکومت نے فوج طلب کرکے لوگوں کو گھروں میں رہنے کی ہدایت کی ہے۔
گذشتہ روز نائب وزیر صحت الیریزا رئیسی نے کہا تھا کہ گذشتہ 24 گھنٹوں کے دوران ملک بھر میں 835 نئے کیس سامنے آئے ہیں ، بیشتر نئے کیسوں کا تعلق دارالحکومت تہران ، قم اور غیلان صوبوں سے ہیں جبکہ کرونا وائرس سے متاثرہ 435 مریضوں کو علاج کے بعد اسپتالوں سے فارغ کردیا گیا ہے۔
دنیا بھر میں کرونا وائرس سے اموات کی تعداد 3203 ہوگئی جبکہ 76 ممالک میں 93ہزار160افراد وائرس کا شکار ہیں اور 50 ہزار سے زیادہ افراد صحت یاب ہوچکے ہیں۔
