دبئی: متحدہ عرب امارات کی ریاستی پولیس نے کرونا سے متاثرہ نوجوان کو قرنطینہ کی خلاف ورزی پر گرفتار کرلیا، مذکورہ شخص کی ویڈیو سماجی رابطے کی ویب سائٹ پر وائرل ہوئی تھی۔
خلیج ٹائمز کی رپورٹ کے مطابق دبئی پولیس کے کریمنل انویسٹی گیشن ڈیپارٹمنٹ کے سربراہ بریگیڈیئر جمال سالم الجلف نے بتایا کہ مذکورہ نوجوان کرونا سے متاثر ہے جسے قرنطینہ میں رکھا گیا تھا۔
انہوں نے بتایا کہ نوجوان نے قرنطینہ قوانین کی خلاف ورزی کی اور کافی پیتے ہوئے ویڈیو بنائی۔بریگیڈیئر جمال سالم کا کہنا تھا کہ نوجوان کی ویڈیو دیکھ کر شہری خوف زدہ ہوگئے تھے اور پھر انہوں نے پولیس کو شکایت درج کی تھی۔
اُن کا کہنا تھا کہ نوجوان کو گرفتار کر کے ایک بار پھر قرنطینہ میں ڈال دیا گیا ہے جب کہ قوانین کی خلاف ورزی کرنے پر اُس پر پانچ لاکھ درہم جرمانہ عائد کیا گیا ہے۔
بریگیڈیئر الجلف کا کہنا تھا کہ ’نوجوان نے آئسولیشن کے لیے اپنے گھر کا انتخاب کیا تھا، اُس نے موقع ملتے ہی دانستہ طور پر ویڈیو بنائی اور پھر اسے سوشل میڈیا پر شیئر کیا‘۔
انہوں نے لکھا کہ ’ہم نے مذکورہ نوجوان کو سنگین غفلت کرنے پر حراست میں لیا کیونکہ اُس کی وجہ سے اور شہریوں کی زندگی کو خطرات لاحق ہوسکتے تھے‘۔
دبئی پولیس کے آفیسر نے بتایا کہ ’متحدہ عرب امارات کے سائبر کرائم قوانین کے آرٹیکل 31 کی خلاف ورزی پر 2 لاکھ سے 10 لاکھ درہم تک جرمانہ عائد کیا جاسکتا ہے‘۔
