راولپنڈی: آرمی چیف جنرل عاصم منیر کا کہنا ہے کہ پاکستان کی مسلح افواج دفاع وطن کے لیے عوام کے ساتھ متحد ہوکر کھڑی ہیں۔
آرمی چیف جنرل عاصم منیر کی زیر صدارت اسپیشل کور کمانڈرز کانفرنس ہوئی جس میں بھارت کے الزامات اور کشیدگی کی صورت حال پر تبادلہ خیال کیا گیا جبکہ خطے کی موجودہ صورت حال کا جامع جائزہ، پاک بھارت کشیدگی اور علاقئی سلامتی پر بھی غور کیا گیا۔
آرمی چیف نے مسلح افواج کی پیشہ ورانہ مہارت، ثابت قدم حوصلے اور آپریشنل تیاریوں کو سراہا اور تمام محاذوں پر چوکنا رہنے اور فعال تیاریوں کی اہمیت پر زور دیا۔
شرکا نے عزم ظاہر کیا کہ پاک فوج ہر قیمت پر مادر وطن کا دفاع کرنے کے لیے تیار ہیں اور جارحیت یا مہم جوئی کے خلاف ملکی خود مختاری اور علاقائی سالمیت کو برقرار رکھنے کے عزم کا اعادہ کیا۔
فورم نے بھارت کے غیرقانونی طور پر مقبوضہ کشمیر میں بھارتی مظالم پر اظہار تشویش کیا اور کہا کہ پہلگام واقعے کے بعد بھارتی افواج ایل او سی کے معصوم شہریوں کو نشانہ بنا رہی ہے، بھارتی فوج کی غیر انسانی اور بلا اشتعال کارروائیاں علاقائی کشیدگی کو بڑھاتی ہیں۔
کور کمانڈرز کانفرنس کے شرکا نے بھارت کے سیاسی اور فوجی مقاصد کے لیے گھڑے خود ساختہ بحرانوں پر تشویش ظاہر کی اور کہا کہ بھارت اندرونی انتظامی ناکامیوں کو چھپانے کے لیے بیرونی رنگ دیتا رہا ہے، بھارت یکطرفہ چالوں سے اسٹیٹس کو کو تبدیل کرنے کی کوشش کرتا ہے۔
شرکا نے بتایا کہ 2019 میں بھارت نے آرٹیکل 370 کی منسوخی کے لیے پلوامہ کا ڈرامہ رچایا، پہلگام کے حالیہ واقعے کا مقصد پاکستان کی توجہ مغربی سرحدوں سے ہٹانا اور پاکستان کی اقتصادی بحالی کے لیے جاری کوششوں سے توجہ ہٹانا ہے۔
کور کمانڈرز کے شرکا ن ےکہا کہ پاکستان دو عوامل میں فیصلہ کن اور پائیدار ترقی کی جانب گامزن ہے، بھارت کو مذموم ہتھکنڈوں کے ذریعے دہشت گرد پراکسیوں کو فعال کرنے میں ناکامی ہوگی، بھارت پہلگام واقعے کی آڑ میں سندھ طاس معاہدے کو نقصان پہنچا رہا ہے۔
شرکا نے کہا کہ جنگ مسلط کرنے کی کسی بھی کوشش کا یقینی اور فیصلہ کن جواب دیا جائے گا، پاکستان کے عوام کی امنگوں کا ہر قیمت پر احترام کیا جائے گا۔
