بدعنوانی کا الزام : سی اے اے کے ڈائریکٹراورایڈیشنل ڈائریکٹر جبری طور پر ریٹائرڈ
مذکورہ افسران کے خلاف رقم کی ریکوری کیلئے علیحدہ سے کارروائی عمل میں لائی جائے گی، سول ایوی ایشن اتھارٹی
کراچی : سول ایوی ایشن اتھارٹی نے ڈائریکٹر اور ایڈیشنل ڈائریکٹر کو جبری طور پر ریٹائرڈ کردیا، سمیر سعید اور ریاض احمد پر ادارے کو نقصان پہنچانے کا الزام ہےادارے کو کروڑوں روپے نقصان پہنچانے کا الزام ہے۔
تفصیلات کے مطابق سول ایوی ایشن اتھارٹی کے ڈائریکٹر اور ایڈیشنل ڈائریکٹر پر مبینہ بدعنوانی کا معاملہ پر سی اے اے نے دونوں عہدیداران کو جبری طور پر ریٹائرڈ کردیا۔
ڈائریکٹر انجنیئرنگ سروسز سمیر سعید اور ایڈیشنل ڈائریکٹر ریاض احمد کو فوری طور پر لازمی ریٹائرمنٹ دے دی گئی، دونوں افسران کو سروسز ریگولیشن2014 کے تحت ریٹائرڈ کیا گیا ہے۔
اس حوالے سے ذرائع کاکہنا ہے کہ ڈائریکٹر سمیر سعید پر مبینہ طور پر ساڑھے چار کروڑ روپے ادارے کو نقصان پہنچانے کا الزام ہے، سول ایوی ایشن اتھارٹی نے ڈائریکٹر اور ایڈیشنل ڈائریکٹر کو متعدد شوکاز نوٹس جاری کیے لیکن وہ انتظامیہ کو مطمئن نہ کرسکے۔
ذرائع کے مطابق دونوں مذکورہ افسران کے خلاف رقم کی ریکوری کیلئے علیحدہ سے کارروائی عمل میں لائی جائے گی، سول ایوی یشن اتھارٹی نے تاحال ادارے کو کروڑوں روپے نقصان پہنچانے والے افسران کے کیس کو نیب نہیں بھیجا۔ افسران کے کیس کو نیب کے بجائے دفتری طور پر کارروائی کرکے جبری طور ریٹائرڈ کیا گیا۔
