کراچی : کرپشن، اختیارات کا ناجائز استعمال اور دیگرسنگین الزامات سے متعلق کرپشن کے کون سے مقدمات نیب کے پاس رہیں گے اور کون سے دوسرےاداروں کو منتقل ہوں گے؟
ذرائع کا کہنا ہے کہ ترمیمی آرڈیننس کے بعد نیب نے ریویو کمیٹی تشکیل دے دی، اس حوالے سے ڈپٹی ڈائریکٹر نیب قمر عباسی نے سندھ ہائی کورٹ کو آگاہ کردیا ہے۔
ڈپٹی ڈائریکٹر نیب نے عدالت کو بتایا کہ ریویو کمیٹی ملک بھر کے نیب بیوروز میں جاکر کیسز کا جائزہ لے رہی ہے، بیشتر کیسز احتساب عدالتوں نے بھی واپس نیب کو ارسال کیے ہیں۔
انہوں نے بتایا کہ احتساب عدالتوں سے نیب کو واپس بھیجے گئے کیسز کا جائزہ لیا جارہا ہے، ریفرنسز، انکوائریاں ریویو کمیٹی کے جائزہ لینے کے بعد متعلقہ اداروں کو بھیجے جائیں گے۔
نیب رپورٹ میں کہا گیا ہے کہ ریویو کمیٹی ہزاروں کیسز کا جائزہ لے رہی، جواب جمع کرانے کیلئے مزید مہلت دی جائے۔
عدالت نے 4ہفتوں میں نیب سے رپورٹ طلب کرلی، کیس کی سماعت جسٹس نعمت اللہ پھلپھوٹو کی سربراہی میں 2 رکنی بینچ نے کی۔
یاد رہے کہ این آئی سی وی ڈی کرپشن ریفرنس میں ملزم محمد جنید نے مقدمہ احتساب عدالت سے سندھ ہائی کورٹ میں منتقل کرنے کی درخواست دائر کی تھی، احتساب عدالت نے ملزم کی درخواست کو مسترد کردیا تھا۔
