اسرائیل نے ایرانی حملہ روک تو لیا لیکن راتوں رات ہونے والا یہ ہولناک حملہ اسرائیل کو کتنا مہنگا پڑا ہے، یہ جان کر آپ حیران رہ جائیں گے۔
اسرائیلی میڈیا نے اتوار کے روز رپورٹس میں کہا ہے کہ اسرائیل کو دو روز قبل ایران کی جانب سے داغے گئے میزائل اور ڈرونز مار گرانا بہت مہنگا پڑا ہے، ایران کا حملہ روکنے کی کوشش میں اسرائیل کے 5 بلین شیکل (ایک ارب 35 کروڑ ڈالر) خرچ ہو گئے۔
وال اسٹریٹ جنرل کے مطابق ڈرون حملہ ناکام بنانے والے ایک ایرومیز میزائل کی قیمت 35 لاکھ ڈالر اور فضائی حملہ ناکام بنانے والے میجک وانڈ میزائل کی قیمت 10 لاکھ ڈالر ہے۔
حملے کو ناکام بنانے والے طیاروں کا خرچ بھی اس رقم میں شامل ہے، پاکستانی کرنسی میں اسرائیل کو ایرانی حملہ ناکام بنانے میں 378 ارب روپے خرچ ہوئے۔
ایرانی حملوں کے بعد جی سیون ممالک کو ہوش آگیا
واضح رہے کہ ایران نے دو روز قبل 300 سے زائد ڈرونز اور میزائلوں کے ساتھ اسرائیل پر حملہ کیا تھا۔ اتوار کو اسرائیلی اخبار ہاریٹز نے اسرائیلی فوج کے ترجمان ڈینیئل ہاگری کے حوالے سے بتایا تھا کہ ایران کی جانب سے اسرائیل پر 350 کے قریب میزائل اور ڈرون داغے گئے جن میں سے بیش تر کو روک دیا گیا۔
ترجمان نے مزید کہا کہ 30 میں سے 25 کروز میزائلوں کو روکا گیا اور 120 سے زیادہ بیلسٹک میزائلوں میں سے صرف چند ہی اسرائیلی حدود میں داخل ہوئے اور نیواتیم ایئر بیس پر گرے، جس سے معمولی نقصان ہوا۔
