سندھ ہائیکورٹ نے الیکشن کمیشن کو کراچی اور حیدرآباد میں بلدیاتی انتخابات کے فوری شیڈول جاری کرنے کا حکم دیا ہے۔
اے آر وائی نیوز کے مطابق سندھ ہائیکورٹ نے جماعت اسلامی اور پاکستان تحریک انصاف کی جلد الیکشن کرانے کی درخواستیں منظور کرتے ہوئے اس پر محفوظ کیا گیا فیصلہ سنا دیا ہے۔
عدالت عالیہ نے الیکشن کمیشن کو کراچی اور حیدرآباد میں بلدیاتی انتخابات کے فوری شیڈول جاری کرنے کا حکم دیا ہے اور سندھ حکومت کو الیکشن کمیشن کو تمام سیکیورٹی اور سہولتیں فراہم کرنے کی ہدایت کی ہے۔
عدالت کی جانب سے اس کا تحریری حکمنامہ آج ہی جاری کیا جائے گا۔
ایم کیو ایم نے فوری بلدیاتی الیکشن رکوانے کی درخواست بھی دائر کر رکھی ہے اور اس کا موقف ہے کہ بلدیاتی قوانین میں ترامیم تک الیکشن کو روکا جائے۔
واضح رہے کہ سندھ میں بلدیاتی الیکشن کے دوسرے مرحلے میں کراچی اور حیدرآباد میں بلدیاتی الیکشن ہونے ہیں تاہم پہلے سندھ میں طوفانی بارشوں کے بعد یہ الیکشن دو بار ملتوی کیے گئے بعد ازاں سندھ حکومت نے متعدد بار اس کے التوا کے لیے کوششیں جاری رکھیں۔
گزشتہ ہفتے کراچی اور حیدرآباد میں بلدیاتی الیکشن ملتوی کرانے کے لیے سندھ حکومت کی جانب سے قانونی رکاوٹ بلدیاتی ایکٹ میں ترمیم کردی گئی تھی اور سندھ کابینہ نے کراچی میں بلدیاتی الیکشن 90 روز تک ملتوی کرنے کی تجویز منظور کی تھی۔
دو روز قبل بھی الیکشن کمیشن میں ہونے والے اجلاس میں سندھ حکومت نے کراچی اور حیدرآباد میں فوری بلدیاتی انتخابات کرنے سے معذرت اور صوبائی وزارت داخلہ نے الیکشن کے لیے فورسز فراہم کرنے سے انکار کردیا تھا۔
سندھ حکومت کی جانب سے بار بار بلدیاتی الیکشن کے التوا کے خلاف جماعت اسلامی اور پاکستان تحریک انصاف نے ہائیکورٹ میں درخواستیں دائر کر رکھی تھیں جس پر رواں ہفتے عدالت نے فیصلہ محفوظ کیا تھا جو آج سنایا گیا ہے۔
