راولپنڈی : عدالت نے وفاقی وزیرداخلہ رانا ثنااللہ کو گرفتار کرکے پیش کرنے کا حکم دیتے ہوئے اشتہاری قرار دینے کی استدعا مسترد کردی۔
تفصیلات کے مطابق مقامی عدالت میں وفاقی وزیر داخلہ راناثنا اللہ سے متعلق کیس کی سماعت ہوئی، مقدمے کی سماعت سینئر سول جج غلام اکبر نے کی۔
دوران سماعت عدالت نے استفسار کیا کہ ابھی وارنٹ گرفتاری جاری ہوئے، یک دم اشتہاری کیسے قرار دیں۔
جج نے ریمارکس دیے دوبارہ اسلام آباد جاؤ، ملزم کوگرفتار کرکےعدالت پیش کرو، جس پر تفتیشی ٹیم نے درخواست کی ملزم چھپ رہا ہے، گرفتاری کی کوشش کی، اب اشتہاری ڈکلئیرکیا جائے۔
جس پر عدالت نے دوبارہ اسلام آباد جا کر وفاقی وزیرداخلہ رانا ثنااللہ کو گرفتار کرکے پیش کرنے کا حکم دیتے ہوئے دوبارہ وارنٹ جاری کرنے اور اشتہاری قرار دینے کی استدعا مسترد کردی۔
خیال رہے رانا ثنا کیخلاف اینٹی کرپشن نے کلرکہار میں مبینہ اراضی فراڈ میں مقدمہ درج کیا تھا۔۔
یاد رہے دو روز قبل راولپنڈی کے سینیئر سول جج کرمنل ڈویژن ماڈل ٹرائل کورٹ غلام اکبر نے وفاقی وزیر داخلہ رانا ثناءاللہ کی ناقابل ضمانت وارنٹ گرفتاری جاری کیے تھے، رانا ثناء اللہ پر 420، 471، 109، 467، 468اور دیگر دفعات کے تحت اینٹی کرپشن سیل کو مطوب ہے۔
ترجمان اینٹی کرپشن نے وضاحت کی تھی کہ اینٹی کرپشن انکوائری میں حاضر نہ ہونے کے باعث رانا ثنا اللہ کے ناقابل ضمانت وارنٹ گرفتاری مقدمہ نمبر20/19 میں جاری ہوئے ہیں۔
