کراچی: شہر قائد میں ایکسپو سینٹر میں عام شہریوں کے لیے کرونا ویکسی نیشن آج سے شروع ہو رہی ہے۔
تفصیلات کے مطابق صوبہ سندھ میں لاک ڈاؤن کے نفاذ کے ساتھ ویکسینیشن کے عمل میں بھی تیزی آ گئی ہے، ایکسپو سینٹر میں کرونا ویکسی نیشن عام شہریوں کے لیے آج سے شروع ہوگی۔
محکمہ صحت سندھ کا کہنا ہے کہ ویکسی نیشن سینٹر میں 100 بوتھ بنائے گئے ہیں، سینٹر میں 30 ہزار افراد کی یومیہ ویکسی نیش کی جا سکے گی، اسی سینٹر میں سرکاری اداروں کے ملازمین کی ویکسی نیشن بھی کی جا رہی ہے۔
ڈائریکٹر نرسنگ اسکول کا کہنا ہے کہ ایکسپو سینٹر میں 400 تربیت یافتہ نرسنگ اسٹوڈنٹس تعینات ہیں۔
پاکستان کا سب سے بڑا ویکسینیشن سینٹر کراچی میں قائم
دوسری طرف شہر کے نجی اسپتالوں میں بھی مفت ویکسین لگانے کا عمل شروع ہو رہا ہے، او ایم آئی اسپتال میں مفت ویکسین کی سہولت کا آغاز آج سے ہو جائے گا۔
واضح رہے کہ سندھ حکومت کی جانب سے کراچی ایکسپو سینٹر میں قائم یہ پاکستان کا سب سے بڑا ویکسی نیشن مرکز ہے، اس میگا سینٹر میں ویکسین لگانے کا عمل بلا تعطل 24 گھنٹے جاری رہے گا۔
عید کے 3 دنوں کے علاوہ شہر بھر میں ویکسی نیشن سینٹر کھلے رہیں گے، سندھ حکومت نے وضاحت کی ہے کہ کرونا ویکسی نیشن سینٹرز 13 سے 15 مئی تک بند رہیں گے۔
