نیویارک: کرونا وائرس کی ویکسین نے دنیا میں 9 افراد کو ارب پتی بنا دیا ہے۔
تفصیلات کے مطابق کرونا ویکسین کی فروخت سے ہونے والے مالی منافع نے دنیا میں کم از کم نو افراد کو ارب پتی بنا دیا ہے۔
کرونا ویکسین کی فروخت سے ارب پتی افراد میں نو کے اضافے کے حوالے سے پیپلز ویکسین الائنس نامی ادارے نے کہا ہے کہ ان نئے ارب پتیوں کے پاس اب مجموعی طور پر 19.3 ارب ڈالر ہیں، جو کہ کم آمدنی والے ممالک میں تمام افراد کو 1.3 مرتبہ ویکسین لگانے کے لیے کافی ہیں۔
ادارے کا کہنا ہے کہ یہ دولت ’فوربز رچ لسٹ‘ کے اعداد و شمار پر مبنی ہے۔
عالمی سطح پر غربت کے خاتمے کے لیے بیس خیراتی اداروں کی تنظیم آکسفیم سے تعلق رکھنے والی اینا میریٹ نے سخت الفاظ میں تنقید کی ہے کہ یہ ارب پتی افراد دراصل دوا ساز کمپنیوں کی دولت کی انسانی شکل ہیں، جو کہ ویکسینز کی خرید و فروخت کے نظام پر قابض ہیں۔
پیپلز ویکسین الائنس نے دوا ساز کمپنیوں سے مطالبہ کیا ہے کہ ویکسین کی ٹیکنالوجی پر زیادہ سرمایہ لگانا بند کیا جائے، الائنس نے یہ بھی کہا کہ ان 9 افراد کے علاوہ ویکسین کی وجہ سے 8 موجودہ ارب پتی افراد نے بھی اپنی مجموعی دولت میں 32.2 ارب ڈالر کا اضافہ کیا ہے۔
خیال رہے کہ ویکسین ارب پتی افراد کی نئی فہرست میں سب سے پہلا نام موڈرنا کے سی ای او اسٹیفن بینسل کا ہے، ان کے بائیو این ٹیک کے ساتھی اوگر ساہن بھی فہرست میں شامل ہیں، دیگر 3 نئے ارب پتی چینی ویکسین کمپنی کین سائنو بائیولاجکز کے ساتھی بانی ہیں۔
