راجن پور : سی ٹی ڈی کے اہلکاروں نے راجن پور میں دہشت گردوں سے مقابلہ کے دوران دہشت گردوں کو ہلاک کردیا۔ ملزمان کے قبضے سے بھاری تعداد میں اسلحہ برآمد کرلیا گیا۔
تفصیلات کے مطابق راجن پور میں محکمہ انسداد دہشت گردی (سی ٹی ڈی) کے آپریشن کے دوران 2 دہشت گرد ہلاک ہوگئے، ہلاک دہشت گردوں کی شناخت الیاس اور عرفان اللہ کے نام سے ہوئی، جبکہ 3دہشت گرد فرار ہونے میں کامیاب ہوگئے۔
ترجمان سی ٹی ڈی کے مطابق دہشت گرد راجن پور میں حملے کی منصوبہ بندی کررہے تھے، ٹیم چھاپا مارنے پہنچی تو دہشت گردوں نے فائرنگ کردی، دونوں دہشت گرد اپنے ہی ساتھیوں کی فائرنگ سے مارے گئے۔
ہلاک شدگان دہشت گردوں کے قبضے سے دھماکاخیزمواد، اسلحہ، ڈیٹونیٹراور پرائما کورڈ برآمد ہوئے ہیں، دہشت گردوں کا تعلق کالعدم تحریک طالبان جماعت الاحرار سے ہے۔ فائرنگ کے تبادلے میں 3دہشت گرد فرار ہوگئے جن کی تلاش میں چھاپے مارے جارہے ہیں۔
ترجمان سی ٹی ڈی کے مطابق دہشت گرد قانون نافذ کرنے والے اداروں پر حملے کی منصوبہ بندی بنا رکھی تھی، دہشت گردوں سے مقابلے کامقدمہ تھانہ سی ٹی ڈی ڈی جی خان میں درج کرلیا گیا ہے۔
