کوئٹہ اور ضلع واشک میں محکمہ انسداد دہشت گردی (سی ٹی ڈی) نے انٹیلی جنس بیسڈ آپریشن کے دوران 8 دہشت گردوں کو ہلاک کردیا۔
اے آر وائی نیوز کے مطابق بلوچستان کے علاقے بسیمہ میں مکان پرسی ٹی ڈی نے چھاپہ مارا، اس دوران فائرنگ کے تبادلے میں 5مبینہ دہشت گرد ہلاک کردیئے گئے۔
ترجمان سی ٹی ڈی کے مطابق کارروائی کے دوران 3دہشت گرد فرار ہونے میں کامیاب ہوئے، جبکہ دہشت گردوں کے زیر استعمال مکان سے اسلحہ و گولہ بارود بر آمد کرلیا گیا ہے۔
ترجمان سی ٹی ڈی کے مطابق کوئٹہ میں ہوئے سرچ آپریشن کے دوران 3دہشت گردوں کو ہلاک کیا گیا، جبکہ دہشت گردوں کے ٹھکانے سے ایک مغوی ابوبکر کو بازیاب کرالیا گیا۔
ترجمان سی ٹی ڈی نے بتایا کہ شہری ابوبکر کوایک ماہ قبل کوئٹہ سے اغوا کیا گیا تھا، کوئٹہ میں مارے گئے دہشت گردوں کا تعلق کالعدم تنظیم داعش سے ہے۔ ہلاک دہشت گردوں کے ٹھکانوں سے بھاری مقدارمیں اسلحہ و گولہ بارود برآمد کرلیا گیا ہے۔
