راولپنڈی : پاک فوج کے شعبہ تعلقات عامہ آئی ایس پی آر کا کہنا ہے کہ بنوں میں دہشت گردوں کیخلاف آپریشن کامیابی سے جاری ہے۔
ڈی جی آئی ایس پی آر کی جانب سے جاری کردہ بیان کے مطابق سی ٹی ڈی آفس بنوں میں کیا جانے والا آپریشن کامیابی سے تکمیل کی طرف گامزن ہے۔
ان کا کہنا ہے کہ بنوں میں دہشت گردوں کیخلاف کی جانے والی کارروائی جلد مکمل ہوجائے گی۔ آئی ایس پی آر کے مطابق پاک فوج کے آپریشن سے متعلق مزید تفصیلات سے جلد آگاہ کیا جائے گا۔
واضح رہے کہ آج صبح کی کارروائی کے دوران بنوں میں سیکیورٹی فورسز نے سی ٹی ڈی کمپاؤنڈ کے اندر سیکیورٹی اداروں نے کامیاب آپریشن کرتے ہوئے 6 دہشتگردوں کو ہلاک کردیا۔
سی ٹی ڈی کمپاؤنڈ کے اندر کامیاب آپریشن کے بعد اس وقت سرچ آپریشن کا عمل تاحال جاری ہے، آپریشن کے بعد کمپاؤنڈ کو کلیر کرایا جارہا ہے۔
سی ٹی ڈی کی عمارت میں موجود دہشت گردوں سے دو روز تک مذاکرات ہوئے لیکن وہ کامیاب نہ ہوسکے، جس کے بعد عمارت میں آپریشن کی ذمہ داری سیکیورٹی فورسز کو تفویض کی گئی تھی۔
مزید پڑھیں : سی ٹی ڈی کمپاؤنڈ بنوں پر حملہ کرنے والے 6 دہشتگرد ہلاک
واضح رہے کہ اتوار کے روز بنوں میں دہشتگردوں نے سی ٹی ڈی کمپاؤنڈ پر حملہ کیا تھا اور اہلکاروں کو یرغمال بنا لیا تھا جس پر سکیورٹی فورسز نے آپریشن شروع کیا تھا۔
ذرائع کے مطابق بنوں میں اسکول بند ہیں اور اسپتالوں میں ایمرجنسی نافذ ہے جب کہ علاقے میں موبائل فون سروس بھی مکمل طور پر بند ہے۔
