بنوں : کے پی کے میں کاؤنٹر ٹیررازم ڈیپارٹمنٹ (سی ٹی ڈی) کے دفتر پر درجنوں دہشت گردوں نے دھاوا بول دیا، فائرنگ سے دو سیکیورٹی اہلکار زخمی ہوگئے۔
تفصیلات کے مطابق بنوں میں محکمہ انسداد دہشت گردی کے دفتر پر دہشت گردوں نے حملہ کردیا جس کے نتیجے میں دو سیکیورٹی اہلکار زخمی ہوگئے جنہیں طبی امداد کیلئے اسپتال منتقل کردیا گیا ہے۔
اس حوالے سے ذرائع کا کہنا ہے کہ دہشت گردوں کی تعداد 20 سے25 تک بتائی جارہی ہے، اطلاع ملتے ہیں قانون نافذ کرنے والے ادارے کے اہلکار جائے وقوعہ پر پہنچ گئے۔
ذرائع کے مطابق دہشت گردوں کو پکڑنے کے لیے علاقے اور اطراف کی گلیوں کو سیل کردیا گیا، شدت پسندوں اور پولیس کے درمیان فائرنگ کے تبادلے میں ہلاکتوں کا خدشہ بھی ظاہر کیا جارہا ہے۔
مزید پڑھیں : لکی مروت میں دہشت گردوں کا حملہ، 4 پولیس اہل کار شہید
واضح رہے کہ آج صبح خیبر پختون خوا کے ضلع لکی مروت میں دہشت گردوں نے دستی بموں اور راکٹوں سے حملہ کرکے پولیس اہل کاروں کو شہید کردیا۔
لکی مروت میں رات گئے تھانہ برگئی پر دستی بموں اور راکٹ لانچرز سے لیس دہشت گردوں نے حملہ کیا، جس میں 4 پولیس اہلکار شہید اور 4 زخمی ہوگئے۔
