تازہ ترین

سی ٹی ڈی کا کورنگی میں مبینہ مقابلہ، ایم کیو ایم لندن کا دہشتگرد ہلاک، اسلحہ برآمد

کراچی : سی ٹی ڈی نے کورنگی میں کارروائی کرکے ایم کیو ایم لندن کے مبینہ دہشت گرد اعظم عرف گنجا کو ہلاک کرکے اسلحہ برآمد کرلیا۔

تفصیلات کے مطابق انسداد دہشتگردی فورس نے وفاقی ادارے کے ساتھ ملکر باغ کورنگی میں دہشتگردوں کے خلاف کارروائی کی، اس دوران مبینہ مقابلہ بھی ہوا۔

مقابلے کے دوران ایم کیو ایم لندن کا مبینہ دہشتگرد اعظم عرف گنجا ہلاک ہوگیا جبکہ ایک ملزم فرار ہوگیا۔

سیکیورٹی اداروں نے مقابلے کے بعد ہلاک دہشت گرد سے پستول برآمد کرلی۔

ترجمان سی ٹی ڈی کا کہنا تھا کہ اعظم عرف گنجا کورنگی سیکٹر کی ٹارگٹ کلنگ ٹیم کا اہم رکن تھا اور بدنام زمانہ ٹارگٹ کلر جنید بلڈوگ کا قریبی ساتھی بھی تھا۔

ترجمان نے بتایا کہ ملزم اعظم 2012 اور 2013 میں یونٹ و سیکٹر کے احکامات پر ٹارگٹ کلنگ کرتا تھا، اعظم گنجا نے تصویر محل میں پولیس چوکی پر یونٹ انچارج کے حکم پر ایک شخص کو قتل کیا اور 2013 میں سیکٹر انچارج کی ہدایت پر کے ڈی اے افسر جبارمنگی کو موت کے گھاٹ اتارا۔

ترجمان سی ٹی ڈی کے مطابق ملزم نے 2013 میں لانڈھی میں ایم کیو ایم حقیقی کے کارکن فاروق کو قتل کیا اور کورنگی میں پکڑ کر بٹھائے گئے اپنے کارکن کو سیکٹر انچارج کی ہدایت پر موت کی نیند سلایا۔

ملزم کے خلاف سی ٹی ڈی میں دو مقدمات درج تھے جبکہ ملزم عدالت سے مفرور اور اشتہاری تھا۔

ترجمان انسداد دہشتگردی فورس نے مزید بتایا کہ ملزم کا اسلحہ فرانزک کےلیے بھجوایا جارہا ہے۔

Comments

- Advertisement -