کراچی : ڈائریکٹوریٹ کسٹمز انٹیلی جنس اینڈ انویسٹی گیشن کراچی نے کامیاب کارروائی کرتے ہوئے دو ٹرکوں سے کروڑوں روپے کی اشیاء اسمگل کرنے کی کوشش ناکام بنادی۔
اس حوالے سے ڈی جی کسٹمزانٹیلی جنس کا کہنا ہے کہ یونیورسٹی روڈ اور راشد منہاس روڈ سے ممنوعہ سامان سے بھرے دو ٹرک تحویل میں لے کر اسمگلنگ کی کوشش ناکام بنادیا۔
انہوں نے بتایا کہ کسٹمز انٹیلی جنس نے کارروائی کے دوران3ملزمان کو بھی گرفتارکیا، مذکورہ ٹرکوں سے38کروڑ30لاکھ روپے مالیت کا ممنوعہ سامان ضبط کیا گیا ہے۔
ڈی جی کسٹمز کے مطابق برآمد کیے جانے والے سامان میں 3600لیپ ٹاپ،2396گھڑیاں، ایئرکرافٹ انجن آئل، اور دیگر بھارتی سامان شامل ہے۔
انہوں نے چھاپے کی تفصیلات بتاتے ہوئے کہا کہ کسٹمز انٹیلی جنس کے عملے نے اسمگلنگ کے سامان سے بھرے ٹرکوں کا پیچھا کرکے گودام کا سراغ لگایا۔
دوران تفتیش ٹرک ڈرائیور اسمگل شدہ سامان کی قانونی دستاویز فراہم کرنے میں ناکام رہے، ملزمان کے خلاف ایف آئی آر درج کرلی گئی ہے اور مزید تفتیش کی جارہی ہے۔
