دنیا کی سب سے بڑی گوشت فراہم کرنے والی کمپنی کے انفارمیشن سسٹم پر سائبر حملہ ہوگیا جس کی وجہ سے گوشت کی فراہمی بند ہوگئی۔
بین الاقوامی میڈیا کے مطابق گوشت فراہم کرنے والی دنیا کی سب سے بڑی کمپنی پر سائبر حملہ کر دیا گیا۔ سائبر حملہ گوشت فراہم کرنے والی دنیا کی سب سے بڑی کمپنی جے بی ایس کے انفارمیشن سسٹم پر ہوا جس کی وجہ سے گوشت کی فراہمی بند ہوگئی۔
جے بی ایس کے جاری کردہ بیان کے مطابق سائبر حملہ کمپنی کے آسٹریلیا اور شمالی امریکا میں موجود یونٹس پر ہوا جس سے کمپنی کا آسٹریلیا میں موجود یونٹ بند ہوگیا۔
کمپنی کا کہنا تھا کہ مسئلہ حل کرنے کے لیے کچھ وقت درکار ہوگا تاہم اس دوران کسٹمرز اور سپلائرز کو تاخیر کا سامنا کرنا پڑ سکتا ہے کیونکہ سائبر حملے کی وجہ سے ہزاروں ملازمین کو کام سے روک دیا گیا ہے۔
گوشت پروسیسنگ کی صنعت ریگولیٹری معیارات کی تعمیل کرنے کے لیے ریکارڈ کو برقرار رکھنے کے علاوہ جانوروں سے باخبر رہنے اور درجہ بندی کے لیے کمپیوٹر اور سافٹ ویئر سسٹم پر انحصار کرتی ہے۔
