سکھر: ضلع خیرپور کے نواحی علاقے میں پولیس کے ساتھ مقابلے کے دوران ڈاکو سائین دنوں ناریجو ہلاک ہوگیا جو انتہائی مطلوب تھا۔
ڈی آئی جی سکھر فیصل عبداللہ نے بتایا کہ ہلاک ڈاکو سائین دنوں ناریجو کے سر کی قیمت 50 لاکھ روپے مقرر کی گئی تھی، مقابلے میں ڈاکو کی فائرنگ سے ایک پولیس اہلکار زخمی ہوا جسے کراچی منتقل کر دیا۔
فیصل عبداللہ نے بتایا کہ ہلاک ڈاکو 60 سے زائد سنگین مقدمات میں پولیس کو مطلوب تھا۔
نومبر میں یوٹیوب پر چینل بنانے کی وجہ سے مشہور کچے کا انتہا مطلوب ڈاکو شاہد لونڈ مبینہ طور پر اپنے ہی شاتھیوں کی فائرنگ سے ہلاک ہوگیا تھا۔
ذرائع نے اے آر وائی نیوز کو بتایا تھا کہ عمر لونڈ اور اس کے ساتھیوں نے فائرنگ کر کے انتہائی مطلوب ڈاکو کو قتل کیا، شاہد لونڈ اور عمر لونڈ کے درمیان تلخ کلامی کے بعد فائرنگ کا تبادلہ ہوا تھا۔
دوسری جانب، پنجاب پولیس کا کہنا تھا کہ شاہد لونڈ کو رحیم یار خان اور راجن پور پولیس کی مشترکہ کارروائی میں کچہ بنگلہ اچھا میں ہلاک کیا گیا۔
ترجمان پنجاب پولیس نے بتایا تھا کہ حکومتِ پنجاب نے ہلاک ڈاکو کے سر کی قیمت 1 کروڑ روپے مقرر کی تھی، شاہد لونڈ قتل اور ڈکیتی سمیت متعدد مقدمات میں پولیس کو مطلوب تھا۔
ادھر، آئی جی پنجاب ڈاکٹر عثمان انور نے کامیاب کارروائی پر رحیم یار خان اور راجن پور پولیس کو شاباشی دی تھی اور کہا تھا کہ کچے کے علاقے سے دہشتگردوں اور ڈاکوؤں کا خاتمہ مشن ہے۔
شاہد لونڈ نے رواں سال اگست میں اپنا یوٹیوب چینل لانچ کیا تھا۔ ڈاکو محمد یار بلوچ کی جانب سے ایک ویڈیو بھی منظر عام پر آئی تھی جس میں چینل کو زیادہ سے زیادہ لائیک اور سبسکرائب کرنے کی درخواست کر رہے تھے۔
