راولپنڈی: آسٹریلیا کے پچ ماہر ڈیمئن ہوف نے پنڈی کرکٹ اسٹیڈیم کا دورہ کر کے پچز کا جائزہ لیا۔
تفصیلات کے مطابق آسٹریلوی پچ ماہر نے جمعرات کو راولپنڈی کرکٹ اسٹیڈیم کی پچز کا معائنہ کیا ہے، ڈیمئن ہوف نے مقامی کیوریٹرز اور کوچز کو پچز کی تیاری پر لیکچر بھی دیا۔
ڈیمئن ہوف کل نیشنل اسٹیڈیم کراچی کی پچز اور آؤٹ فیلڈ کا بھی معائنہ کریں گے، اس سے قبل آسٹریلوی پچ ماہر نے قذافی اسٹیڈیم لاہور کی پچز اور آؤٹ فیلڈ کا جائزہ لیا تھا۔
واضح رہے کہ انگلش بورڈ کا ایک سیکیورٹی وفد بھی پاکستان کے ساتھ سیریز کے سلسلے میں پاکستان کے دورے پر ہے، جس نے مختلف شہروں میں کرکٹ اسٹیڈیمز کا دورہ کر کے انتظامات کا جائزہ لیا۔
اس 4 رکنی وفد میں رچرڈ اسنوبال، رابرٹ لنچ، جان کار اور ریج ڈکاسن شامل ہیں، وفد نے مختلف شہروں میں ایئر پورٹ سے ہوٹل تک اور ہوٹل سے اسٹیڈیم کے روٹ کا جائزہ لیا۔
انگلش ٹیم رواں سال 7 ٹی ٹوئنٹی میچز اور 3 ٹیسٹ میچز کے لیے پاکستان آئے گی، تاہم حتمی شیڈول کا فیصلہ سیکیورٹی وفد کی رپورٹ کی بنیاد پر ہوگا۔
آسٹریلیا کے کامیاب دورہ پاکستان کے بعد غیر ملکی ٹیموں کے سیکیورٹی خدشات ختم ہو چکے ہیں، اور بین الاقوامی ٹیمیں اب پاکستان کا دورہ کرنے میں دل چسپی رکھتی ہیں۔
