اسلام آباد: ایف آئی اے سائبر کرائم سرکل نے ماڈلنگ کی آڑ میں خواتین کو جنسی طور پر ہراساں کرنے والے ایک ملزم کو گرفتار کیا ہے جس کی شناخت دانیال مختار کے نام سے کی گئی ہے۔
تفصیلات کے مطابق ایف آئی اے سائبر کرائم سرکل اسلام آباد نے ایک بڑی کارروائی میں اڈیالہ روڈ راولپنڈی سے ماڈلنگ کی آڑ میں جنسی ہراسگی میں ملوث ملزم دانیال مختار کو گرفتار کر لیا، ملزم کلاسیفائیڈ ویب سائٹس پر ملازمت کے جعلی اشتہارات لگاتا تھا۔
ایف آئی اے حکام کا کہنا ہے کہ ملزم خود کو ماڈلنگ ایجنسی کا مالک ظاہر کرتا تھا، اور ضرورت برائے ماڈلز کے اشتہارات لگا کر خواتین کو اپنے جال میں پھنساتا تھا۔
ایف آئی اے کے مطابق ملزم نے متعدد خواتین سے ملازمت کے نام پر قابل اعتراض تصاویر اور ویڈیوز کا مطالبہ کیا، اور پھر قابل اعتراض تصاویر کی آڑ میں خواتین کو ہراساں اور بلیک میل کرتا رہا۔
ملزم کے قبضے سے موبائل فون اور قابل اعتراض مواد بھی برآمد کر لیا گیا ہے، جس کے بعد اسے باقاعدہ طور پر گرفتار کر کے تفتیش کا آغاز کر دیا گیا ہے۔
