اسلام آباد : نائب وزیراعظم اسحاق ڈار نے پاک بھارت قومی سلامتی کے مشیروں کے درمیان رابطے کی تصدیق کردی۔
تفصیلات کے مطابق نائب وزیر اعظم اسحاق ڈار نے ترک ریڈیو اور ٹیلی وژن ٹی آر ٹی کو انٹرویو میں تصدیق کی پاک بھارت نیشنل سیکیورٹی ایڈوائزرز میں رابطہ ہوا ہے۔
پاکستان نیشنل سیکیورٹی ایڈوائزر انٹر سروسز انٹیلی جنس کے ڈائریکٹر جنرل لیفٹیننٹ جنرل محمد عاصم ملک ہیں جبکہ ان کے ہم منصب اجیت دوول ہیں۔
ان کا کہنا تھا کہ بھارت نے پاکستان کے خلاف جنگی اقدام کیا ہے، پاکستان اب بھارت کو جواب مناسب جواب دینے کا حق رکھتا ہے، پاکستان کے خلاف بھارت نے جو کچھ کیا وہ ناقابل معافی ہے۔
یاد رہے نائب وزیر اعظم وزیر خارجہ و سینیٹر اسحاق ڈار نے پارلیمنٹ میں گفتگو کرتے ہوئے کہا تھا کہ انڈیا کے 75 سے 80 فائٹرز نے بارڈر پر فائر کیا جس کا اسے بھرپور جواب دیا گیا ہے، ایک گھنٹہ سرحد پر جنگ رہی اور ہماری فضائیہ نے بھرپور رسپانس کیا۔
ان کا کہنا تھا کہ بھارت کے جن 5 طیاروں نے پاکستان میں کارروائی کی انہیں مار گرایا ہے باقی طیارے بھی کارروائی کا حصہ بنتے تو انہیں بھی مار گراتے یہ تعداد 15 تک ہوجاتی۔
نائب وزیر اعظم نے مزید کہا کہ واضح ہدایت تھیں جوبھارتی طیارہ حملہ کرنےآگے بڑھے اسی کو تباہ کریں، احتیاط کا مظاہرہ کیا ورنہ بھارت کے دس سے بارہ طیارے گرادیتے۔
