ڈسکہ : ساس نند نے گھریلو ناچاقی پر حاملہ بہو کو بے دردی سے قتل کرکے اس کی لاش کے ٹکڑے کردیے، پولیس نے دونوں کو حراست میں لے لیا۔
اے آر وائی نیوز کی رپورٹ کے مطابق ڈسکہ کے گاؤں کوٹلی مرلاں میں ساس کی بہو سے نفرت کا ہولناک انجام سامنے آیا ہے، ماں بیٹی نے مل کر سات ماہ کی حاملہ بہو کو قتل کرکے اس کی لاش کے ٹکرے کئے اور دو بوریوں میں بند کرکے نالے میں پھینک دی۔
گوجرانوالہ کے گاؤں کوٹ منڈ کی رہائشی 26 سالہ زہرہ کی شادی کوٹلی مرلاں کے قدیر سے چار سال قبل ہوئی تھی جن سے ان کا ایک بیٹا ہے۔
قدیر شادی کے بعد بیرون ملک چلا گیا تو ساس بہو میں ٹھن گئی ساس نے اپنی بیٹی کے ساتھ مل کر بہو سے نفرت کی انتہا کردی۔
پولیس کے مطابق مقتولہ زہرا کے والد نے سسرالیوں کے خلاف اغوا کا مقدمہ درج کرایا تھا، دوران تفتیش ساس اور نند نے گھریلو تنازع پر بہو کو قتل کرنے کا اعتراف کرلیا۔
پولیس حکام نے مزید بتایا ہے کہ مقتولہ زہرا 7 ماہ کی حاملہ تھی اور اس کا شوہر قدیر کاروبار کے سلسلے میں ملک سے باہر ہے۔
ریسکیو 1122نے ملزمہ کی نشاندہی پر نالے سے مقتولہ زہرا کی لاش نکال کر موترہ پولیس کے حوالے کردی ہے مزید قانونی کارروائی جاری ہے۔
یاد رہے کہ اس سے قبل گزشتہ ماہ سوات میں بارامہ کے علاقے میں گھریلو ناچاقی پر بہو نے اپنی ساس کو قتل کردیا تھا۔
واردات کے بعد بہو نے گھر میں ڈکیتی کا ڈرامہ کیا لیکن تفتیش کے دوران بہو نے اعتراف جرم کرلیا۔ جس کے بعد ملزمہ بہو کو گرفتار کر کے مقدمہ درج کرلیا گیا۔
