ممبئی : بھارتی فلموں کی معروف اداکارہ بپاشا باسو اپنی بیٹی کی صحت کے حوالے سے بات کرتے ہوئے پھوٹ پھوٹ کر رو پڑیں۔
فلمی شائقین کے دلوں پر راج کرنے والی اداکارہ بپاشا باسو نے ایک انٹرویو میں اپنی ننھی پری دیوی باسو سنگھ گروور کے ایک خطرناک مرض میں مبتلا ہونے کے متلعق بتایا، اس موقع پر وہ اپنے جذبات پر قابو نہ رکھ سکیں۔
انہوں نے بتایا کہ دیوی کی پیدائش کے تیسرے دن جب پتہ چلا کہ اس کے دل میں دو سوراخ ہیں تو میرے پیروں کے نیچے سے زمین نکل گئی، یہ بتاتے ہوئے وہ بے ساختہ روپڑیں۔
گزشتہ روز نیہا دھوپیا کے انسٹاگرام لائیو انٹرویو میں انہوں نے بتایا کہ جب ان کی بیٹی دیوی پیدا ہوئی تو اس کے تین دن بعد ڈاکٹرز نے بتایا کہ وہ دِل اور خُون کی وَریدوں کے مرض میں مبتلا ہے۔
ان کا کہنا تھا کہ میرے شوہر کرن اس سرجری کیلئے تیار نہیں تھے لیکن مجھے پتا تھا کہ دیوی اس سرجری سے ٹھیک ہوجائے گی اس لیے میں نے بہت ریسرچ کی، ڈاکٹرز سے پوچھا مختلف سرجن سے بھی مشورہ لیا اور پھر دیوی کے 3 ماہ کے ہوجانے کے بعد اس کی سرجری ہوئی اور وہ ٹھیک ہوگئی لیکن فیصلہ مشکل تھا۔
انہوں نے کہا کہ میری اور کرن کی زندگی بطور والدین بے حد مشکل رہی اور میں کبھی بھی نہیں چاہوں گی کہ ان لمحات سے کسی کے بھی والدین کو گزرنا پڑے۔
یاد رہے کہ نومبر 2022 میں شادی کے 6 سال بعد اداکارہ بپاشا باسو اور اداکار کرن سنگھ گروور کے گھر پہلی بیٹی کی پیدائش ہوئی تھی۔
