جنوبی کیرولینا سے تعلق رکھنے والی ایسی ڈیون بار نامی خاتون کے ساتھ یہ واقعہ 1915 میں پیش آیا۔ خاتون کی عمر اس وقت 30 سال تھی اور ان کے گھر والوں اور ڈاکٹر نے انہیں مردہ قرار دے دیا تھا، جس کے بعد ان کی تدفین بھی کردی گئی۔
بین الاقوامی خبر رساں ادارے کی رپورٹ کے مطابق مذکورہ خاتون نے اپنی زندگی کے ابتدائی 30 سال جنوبی کیرولینا کے ایک قصبے میں گزارے۔ 1915 کے موسم گرما میں اس خاتون کو مرگی کا دورہ پڑا اور اُن پر بیہوشی طاری ہوگئی۔
اہل خانہ نے فیملی ڈاکٹر کو بلایا جس نے ایسی ڈیون بار کو مردہ قرار دیا۔ جس کے بعد خاتون کے اہل خانہ کی جانب سے اس کی تدفین کی تیاریں شروع کردی گئیں۔
خاتون کو جب قبر میں اتارا گیا تو اس کی بہن اس وقت وہاں موجود نہیں تھی، تابوت کو 6 فٹ گہرے گڑھے میں رکھ کر مٹی ڈال کر قبر تیار کردی گئی۔ خاتون کی تدفین کے کچھ دیر بعد اتفاق سے اس کی بہن بھی پہنچ گئی۔ اس نے لوگوں سے گزارش کی کہ وہ قبر دوبارہ کھودیں تاکہ وہ اپنی بہن کا آخری بار دیدار کرسکے۔
آخر کار اہل خانہ اس کی بات ماننے کو تیار ہوگئے اور مردہ خاتون کے تابوت کو قبر کھود کر باہر نکالا گیا، پھر جو منظر سامنے آیا اس نے لوگوں کے ہوش اڑادیے۔
تابوت کھلتے ہی ایسی ڈیون کو سیدھا بیٹھا دیکھ کر لوگ خوف میں مبتلا ہوگئے، مردہ قرار دی جانے والی خاتون اپنی بہن کو دیکھ کر مسکرا رہی تھی۔ یہ منظر دیکھ کر سب لوگ وہاں سے بھاگ کھڑے ہوئے۔
خاتون خود ہی گھر پہنچی اور سارا احوال سنایا کہ وہ مری نہیں بلکہ زندہ ہے، اس واقعے کے بعد ایسی ڈیون بار نے معمول کی زندگی گزارنا شروع کی اور مزید 47 سال تک زندہ رہی۔
خاتون کا انتقال 22 مئی 1962 کو ہوا اور مقامی اخبارات نے سرخی لگائی کہ جنوبی کیرولائنا کی خاتون کی آخری تدفین کردی گئی ہے۔
