کراچی: رکن قومی اسمبلی ڈاکٹر عامر لیاقت کے انتقال پر قومی اسمبلی کا اہم ترین اجلاس ملتوی کردیا گیا ہے۔
تفصیلات کے مطابق قومی اسمبلی کا بجٹ سیشن سے متعلق پارلیمنٹ ہاؤس میں قومی اسمبلی کا اجلاس جاری تھا کہ رکن قومی اسمبلی عامر لیاقت کی انتقال کی خبر سامنے آئی۔
اسپیکر قومی اسمبلی راجہ پرویز اشرف نے ایوان کو آگاہ کیا کہ افسوسناک خبر ہے کہ ڈاکٹر عامر لیاقت کا انتقال ہوگیا ہے لہذا ایوان کی کاروائی فوری روکنی چاہیے، بعد ازاں اسپیکر قومی اسمبلی نے ایوان زیریں کا اجلاس کل شام پانچ بجے تک ملتوی کردیا۔
قومی اسمبلی کے اہم ترین اجلاس میں بجٹ سفارشات کو حتمی شکل دی جانی تھی۔
یہ بھی پڑھیں: رکن قومی اسمبلی ڈاکٹر عامر لیاقت حسین انتقال کر گئے
واضح رہے کہ اب سے کچھ دیر قبل رکن قومی اسمبلی ڈاکٹر عامر لیاقت حسین انتقال کر گئے تھے، ایم پی اے پی ٹی آئی جمال صدیقی نے ان کے انتقال کی تصدیق کردی ہے۔
پولیس کی جانب ڈاکٹر عامر لیاقت کی موت کی وجوہات جاننے کیلئے تفتیش جاری ہے۔
