اسلام آباد : عدالت نے بچوں کے سامنے ماں کو گلہ کاٹ کر قتل کرنے والے باپ کو سزا موت کا حکم دے دیا۔
تفصیلات کے مطابق اسلام آباد میں ڈسٹرکٹ اینڈ سیشن کورٹ نے بچوں کے سامنے ماں کو قتل کرنے والے باپ کو سزائے موت کا حکم دے دیا۔
بچوں کی گواہی نے باپ کو سزا موت دلوانے میں اہم کردار ادا کیا، ڈسٹرکٹ اینڈ سیشن جج عطا ربانی نے 15 صفحات پر مشتمل فیصلہ جاری کردیا۔
پراسیکیوٹر رانا حسن عباس نے کیس کی پیروی کی، فیصلے میں کہا گیا کہ پراسیکیوشن کیس کو ثابت کرنے میں کامیاب رہی ہے مجرم کو سزائے موت کا حکم دیا۔
عدالت کا کہنا تھا کہ مجرم ناصر حسین نے 19 نومبر 2020 کو بیوی کو دو بچوں کے سامنے گلہ کاٹ کرقتل کیا، اٹھارہ سال قبل دونوں کی شادی ہوئی سہالہ میں کرائے کے گھر میں رہ رہے تھے، اولاد میں تین بیٹے دو بیٹیاں تھیں مجرم لوڈر چلاتاجبکہ مقتولہ گھروں میں کام کرتی تھی۔
عدالتی فیصلے میں کہا گیا کہ مجرم نشے کا عادی ، بیوی پر ٹارچر کرتا تھا مقتولہ نے رشتہ داروں کو کہیں بار بتایا، مدعی کے مطابق 19 نومبر 2020 کو صبح 8 بجے ان کو کال آئی مقتولہ فرزانہ کو قتل کردیا گیا، مدعی پولی کلینک پہنچے تو مقتولہ کے دو بیٹے حسنین اور محمد عاقب ہسپتال میں موجود تھے۔
بیٹوں نے عدالت کو بیان میں بتایا کہ والد نے ان کے سامنے والدہ کو قتل کیا ،مجرم کے وکیل نے دفاع میں عدالت کو بتایا اس کے خلاف کوئی ثبوت نہیں ،مجرم کے وکیل کے مطابق جو ریکوریز کی گئیں وہ فیک ہیں۔
پراسیکوٹر نے عدالت کو بتایا کہ ملزم کا جرم ثابت کرنے کے کافی شواہد موجود ہیں اور ملزم نے اپنی بیوی کا قتل کرکے پانچ بچے یتیم چھوڑے، تھانہ سالہ پولیس اسٹیشن میں ملزم کے خلاف مقدمہ درج کیا گیا تھا۔
