اسلام آباد: پاکستان میں کرونا وائرس کی ہلاکت خیزی کا سلسلہ جاری ہے، گزشتہ چوبیس گھنٹوں کے دوران وائرس مزید 21 افراد کی جانیں نگل گیا، جس کے بعد اموات کی تعداد 639 ہو گئی ہے۔
نیشنل کمانڈ اینڈ آپریشن سینٹر کی جانب سے جاری اَپ ڈیٹ کے مطابق نئے اور مہلک وائرس کو وِڈ نائنٹین کی عالمگیر وبا سے پاکستان بھر میں 29,465 افراد متاثر ہو چکے ہیں، ملک کے مختلف شہروں میں اس وقت کرونا کے زیر علاج مریضوں کی تعداد 20 ہزار 803 ہے، پاکستان میں 24 گھنٹوں کے دوران کرونا کے 1,991 نئے کیسز رپورٹ ہوئے، جب کہ اب تک 8,023 مریض وائرس سے لاحق ہونے والی بیماری سے صحت یاب ہو چکے ہیں۔
کرونا کی عالمگیر وبا سے دنیا بھر میں 2 لاکھ 80 ہزار انسان جان کی بازی ہار گئے
کمانڈ سینٹر کا کہنا ہے کہ گزشتہ چوبیس گھنٹوں کے دوران ملک میں مزید اکیس اموات رپورٹ ہوئیں، سب زیادہ اموات اب تک خیبر پختون خوا میں ہوئی ہیں جن کی تعداد 234 ہے، اس کے بعد پنجاب میں 192 اموات، سندھ میں 180 اموات، بلوچستان میں 24، اسلام آباد میں 5، جب کہ گلگت بلتستان میں 4 اموات ہوئیں۔
پنجاب میں کرونا کیسز کی تعداد سب سے زیادہ 11,093 ہو گئی، سندھ میں 10,771 کرونا کیسز رپورٹ ہو چکے ہیں، خیبر پختون خوا میں کیسز کی تعداد 4,509، بلوچستان میں 1,935، اسلام آباد میں 641 ہو گئی، گلگت بلتستان میں 430 کرونا کیسز رپورٹ ہوئے، آزاد کشمیر میں کیسز کی تعداد 86 ہے۔
گزشتہ 24 گھنٹوں کے دوران ملک میں 13 ہزار 341 کرونا ٹیسٹ کیے گئے، این سی او سی کے مطابق ملک میں اب تک کرونا کے 2 لاکھ 83 ہزار 517 ٹیسٹ کیے جا چکے ہیں۔
