ایف آئی اے نے ممنوعہ فنڈنگ کیس میں پاکستان تحریک انصاف کے چیئرمین اور سابق وزیراعظم عمران خان کو گرفتار کرنے کا فیصلہ کیا ہے۔
اے آر وائی نیوز کو ذرائع سے ملنے والی اطلاعات کے مطابق ایف آئی اے نے ممنوعہ فنڈنگ کیس میں پاکستان تحریک انصاف کے چیئرمین اور سابق وزیراعظم عمران خان کو گرفتار کرنے کا فیصلہ کیا ہے۔
ذرائع کے مطابق ایف آئی اے نے عمران خان کی گرفتاری کے حتمی فیصلے کیلیے سمری ڈی جی ایف آئی اے کو بھجوا دی ہے جب کہ گرفتاری کے لیے 4 رکنی ٹیم بھی تشکیل دے دی ہے۔
ذرائع کا کہنا ہے کہ ایف آئی اے کی ٹیم لاہور پولیس کی مدد سے عمران خان کو گرفتار کرے گی اور گرفتاری کے بعد انہیں ایف آئی اے اسلام آباد کے حوالے کر دے گی۔
پولیس کے اعلیٰ حکام کا کہنا ہے کہ جیسے ہی اس حوالے سے ایف آئی اے کی جانب سے ہدایات ملیں گی، پولیس ٹیم عمران خان کی گرفتاری کے لیے فوری طور پر زمان پارک پہنچ جائے گی۔
دوسری جانب عمران خان کی گرفتاری کے حوالے سے خبر منظر عام پر آنے کے بعد پی ٹی آئی کارکنوں کی بڑی تعداد زمان پارک پہنچ گئی ہے۔ ان کا کہنا ہے کہ عمران خان ہماری ریڈ لائن ہیں اور ہمیں انہیں گرفتار نہیں ہونے دیں گے۔
واضح رہے کہ عمران خان نے آج لاہور ہائیکورٹ میں بھی پیش ہونا ہے، جس کے لئے سیکیورٹی کے تمام تر انتظامات مکمل کرلیے گئے ہیں۔
