اسلام آباد: حکومت نے اپوزیشن کی جانب سے این آر او مانگنے کی تفصیلات عوام کے سامنے لانے کا فیصلہ کرلیا۔
اے آر وائی نیوز کی رپورٹ کے مطابق وزیراعظم عمران خان کی زیر صدارت پارٹی رہنماؤں اور ترجمانوں کا اجلاس ہوا جس میں اپوزیشن کے این آر او مانگنے کی تفصیلات عوام کے سامنے لانے کا فیصلہ کیا گیا، وزیراعظم نے اپوزیشن کی نیب قانون میں مجوزہ ترامیم کی تفصیلات سامنےلانےکی ہدایت کردی۔
اجلاس میں پارٹی رہنماؤں اور ترجمانوں کو مشیر داخلہ و احتساب شہزاد اکبر نے بریفنگ دی، شہزاد اکبر نے اپوزیشن کی نیب قانون میں مجوزہ تجاویز پر بھی بریفنگ دی۔
وزیر اعظم نے اپوزیشن کی نیب قانون میں تجاویز کواین آر او قرار دیتے ہوئے کہا کہ اپوزیشن کہتی ہے ایک ارب سےکم کرپشن پر نیب کارروائی نہ کرے، اپوزیشن کا مطالبہ ہے کرپشن پر نااہلی کی سزا ختم ہو۔
ذرائع کے مطابق اجلاس میں سینیٹ انتخابات کے طریقہ کار میں تبدیلی پر بریفنگ دی گئی، وزیراعظم نے کہا کہ سینیٹ کےشفاف انتخابات پر اپوزیشن کا دہرا معیار سامنے آیا، ہم شفاف سینیٹ الیکشن کرانا چاہتے ہیں۔
وزیراعظم کو وزرا کی کارکردگی پر بھی بریفنگ دی گئی، عمران خان نے وزرا کو کارکردگی مزید بہتر بنانے کی ہدایت دیتے ہوئے کہا کہ کام پر توجہ رکھی جائے، عوام کو حد درجہ ریلیف فراہم کیا جائے۔