کراچی: سعودی عرب کی جنرل اتھارٹی آف سول ایویشن (گاکا) کا اعلیٰ سطح کا وفد پاکستان پہنچ گیا۔
تفصیلات کے مطابق سعودی عرب کی سول ایوی ایشن اتھارٹی کا وفد پاکستان پہنچ گیا ہے، 8 رکنی سیکیورٹی وفد نے آج صبح ہیڈ کوارٹرز میں ڈائریکٹر سیکیورٹی پاکستان سول ایوی ایشن سے ملاقات کی۔
بات چیت کے دوران فریقین نے برادرانہ تعلقات کو مضبوط بنانے اور باہمی تعاون کو نئی سطح پر لے جانے کے مکمل عزم کا اعادہ کیا، ڈائریکٹر جنرل سی اے اے نے اپنے پیغام میں سعودی وفد کو خوش آمدید کہا اور ان کا خیر مقدم کیا۔
ڈی جی سول ایویشن نے ہدایت کی کہ مختلف ہوائی اڈوں کے دوروں کے دوران سعودی مہمانوں سے مکمل تعاون کیا جائے، اور انھیں ہر ممکن سہولت فراہم کی جائے۔
سربراہ سعودی وفد نے کہا کہ ہم پرتپاک استقبال پر پاکستان سول ایوی ایشن کے شکرگزار ہیں، یہ دورہ دونوں سول ایوی ایشنز کے درمیان دو طرفہ تعلقات کو مضبوط بنانے میں سنگ میل ثابت ہوگا۔
ملاقات کے اختتام پر دونوں اطرف سے تحائف کا تبادلہ بھی ہوا۔
