اسلام آباد: صدر مملکت عارف علوی اور وزیراعظم عمران خان سے ڈی جی آئی ایس آئی لیفٹیننٹ جنرل نوید مختار نے الوادعی ملاقات کی، صدر، وزیراعظم نے لیفٹیننٹ جنرل نوید مختار کی خدمات کو سراہا۔
تفصیلات کے مطابق صدر مملکت عارف علوی اور وزیراعظم عمران خان سے ڈی جی آئی ایس لیفٹیننٹ جنرل نوید مختار نے الوداعی ملاقات کی، وزیراعظم عمران خان نے کہا کہ لیفٹیننٹ جنرل نوید مختار نے بہترین خدمات انجام دیں۔
وزیراعظم عمران خان نے لیفٹیننٹ جنرل نوید مختار کے لیے نیک تمناؤں کا اظہار کیا۔
دوسری جانب صدر مملکت عارف علوی نے لیفٹیننٹ جنرل نوید مختار کی پیشہ ورانہ خدمات کو سراہتے ہوئے کہا کہ آئی ایس آئی کا مادر وطن کے تحفظ اور دہشت گردی کے خلاف اہم کردار ہے۔
صدر عارف علوی نے بھی لیفٹیننٹ جنرل نوید مختار کے لیے نیک تمناؤں کا اظہار کیا۔
واضح رہے کہ ڈی جی آئی ایس آئی نوید مختار 25 اکتوبر 2018 کو اپنے عہدے سے ریٹائرڈ ہورہے ہیں، لیفٹیننٹ جنرل عاصم منیر کو نیا ڈی جی آئی ایس آئی تعینات کیا گیا تھا۔
مزید پڑھیں: لیفٹیننٹ جنرل عاصم منیر آئی ایس آئی کے نئے سربراہ مقرر
فرنٹیئر فورس رجمنٹ کے لیفٹیننٹ جنرل عاصم منیر موجودہ ڈائریکٹر جنرل ملٹری انٹیلیجنس (ایم آئی) ہیں اور اس سے پہلے انہوں نے سیاچن میں ڈویژن کمانڈ کی ہے۔ وہ آپریشنل ایریا میں بریگیڈ کی کمان سنبھال چکے ہیں۔
عاصم منیر پاکستان ملٹری اکیڈمی یعنی پی ایم اے کے فارغ التحصیل نہیں بلکہ انھوں نے آفیسرز ٹریننگ اسکول سے فوج میں کمیشن حاصل کیا تھا۔
