راولپنڈی : ڈی جی آئی ایس پی آر میجر جنرل احمد شریف چوہدری نے پریس کانفرنس میں کہا کہ کوئی سیاسی جماعت اپنے کارندوں کو فوج پرحملہ آور کرادے گی ایسی توقع ہرگز نہیں تھی۔
انہوں نے کہا کہ پہلے سے لوگوں سے کہا گیا کہ ادھرجاؤ اُدھر جاؤ، لوگوں کو پوری تیاری اور منظم منصوبہ بندی کے ساتھ مختلف مقامات پر بھیجا گیا۔
میجر جنرل احمد شریف چوہدری نے کہا کہ اگر پاکستان نے آگے جانا ہے تو9مئی کے سہولت کاروں، منصوبہ سازوں کی شناخت کرنا ہوگی، 9مئی کے واقعات کا اصل مقصد تھا کہ فوج سے فوری ردعمل لیا جائے، ان کی کوشش تھی نقصانات ہوں اور ان سے اپنی سیاست چمکائی جائے۔
9مئی کے ہینڈلرز چاہتے تھے ہم اپنا شدید ردعمل دیں اور ملک میں مزید انتشارپھیلے لیکن فوج نے تحمل اور سنجیدگی کا مظاہرہ کیا جو بالکل ٹھیک کیا۔
انہوں نے کہا کہ 9مئی کے بعد15مئی کو جاری کیے گئے کور کمانڈر اعلامیہ میں واضح ہے کہ تمام اسٹیک ہولڈرز بیٹھ کر اتفاق رائے پیدا کریں تاکہ جمہوریت مضبوط، معاشی استحکام آئے، اسی اعلامیہ میں کہا گیا ہے پاک فوج ہر ایسے عمل کو سپورٹ کرتی ہے اور کرتی رہے گی، ہمارے لئے تمام حقیقی سیاسی جماعتیں قابل احترام، مقدم اور بلاتفریق ہیں۔
ڈی جی آئی ایس پی آر نے کہا کہ فوج کا اس حوالے سے مضبوط نظام ہے، 9مئی ہوا تو تعین ضروری تھا گیریژن پرسیکیورٹی بریچ کے پیچھے غفلت یا ناکامی تو نہیں، غیر ارادی غفلت پر کچھ ذمہ داران سامنے آئے جس کے نتیجے میں انہیں سزائیں دی گئیں۔
انہوں نے اس عزم کا اظہار کیا کہ ہم اپنی طاقت اور جذبہ شہادت اس ملک کی مٹی اور عوام کی حمایت اور محبت سے لیتے ہیں، افواج پاکستان نے آپ کا اور عوام کا سر تمام چیلنجز کے آگے فخر سے بلند رکھا ہے اور آئندہ بھی رکھیں گی۔
